宜幻宜真

陳振聰郵票?

2010-07-16T21:45:00.003+08:00

自我知道郵局有預訂郵票/ 首日封後, 我就成為常客, 每年必定會選講生肖郵票及一些特別/ 有紀念價值的郵票, 因為在中環返工, 好自然都會到郵政總局領取.

昨天我去領取時, 入面的工作人員正幫我找時, 打趣地話: "一份特式街道, 一份陳振聰", 跟著他的同事不解地問: "陳振聰?". 那位工作人員就回答: "生機處處呀麻", 其實我今次係取一套名為"生機處處"的郵票, 是以香港四種獨有的生物品種為題材. 那位人兄竟然將這套郵品與陳振聰聯上關係, 真係幾攪笑.

後話一則, 當陳振聰呢段新聞盛行時, 我的一位同事有次唔小心咁講成種生根, 可能佢太掛住打邊爐時食的生根啦!

快高長大

2010-06-23T23:26:00.003+08:00

今日帶bbb睇醫生, 在診所裡遇到另一位媽媽帶著兩歲大的女兒看病, 那位媽媽問我bbb是否已八個月大了, 足足比真實歲數多了一倍有多, 他還有一星期才四個月!

但係bbb真的快高長大, 我一個月前才買了一些聲稱適合六個月至十二個月大的新衫, 他現在已經不太合身了, 連工人都話覺得佢個人"好長"! 好在我之前買了一些十二至十八個月大的衫給bbb, 但不知可以捱到幾耐呢? 好似大得有點誇張! 不過最緊要係健康同開心就得啦! 但我就要再努力搵奶粉錢同新衫錢了!

網上淘到寶

2010-05-17T19:14:00.007+08:00

雖然網絡世界一日千里, 但係我對於太電子化的交易多少都存有介心, 但有時實在係太忙, 所以我都係呢兩年先開始用網上pps, 網上報稅呀咁. 至於網上購物就更加抗拒, 因為真係驚比人盜取credit card資料, 而且又唔知件貨有冇瑕疵, 質地好唔好咁. 但係有了bbb後, 我作出咗以下的新嘗試, 雖然都係假手於人, 始終都係新開始.

先係從yahoo度睇中咗個媽咪袋內膽, 本想叫ddd用佢個account幫我買, 點知佢個account得負balance 買唔到, 最後只好叫好友Macky幫忙, 呢次經驗都唔錯, 位賣家都好細心咁係個包裹上作出提示, 驚我開嗰陣時會整爛個內膽.

到最近, 因為bbb的身型實在太大了, 朋友之前給我的衫都不太合身了, 但我仲放緊假, 想多留在屋企睇住bbb, 加上都唔知去邊度先可以一次過買到d又平又靚又合我心水的衫. 之前已經聽過同事講淘寶買衫ok, 加上另外一位朋友都話係淘寶買衫, 於是就膽粗粗試下啦. 我叫朋友介紹佢買開既店舖, 又去d forum睇下人哋d介紹, 終於shortlist咗幾間心水舖頭, 真係睇見d款都開心, 價錢又好, 有d又列明size, 真係幾難忍手唔買. 本來我打算叫ddd幫我開個account去買, 但係個過程又有d煩, 而且我見d人要搵集運(即係將唔同店舖既貨集中送去一度先至一次過運嚟香港), 本來想叫朋友個朋友幫忙代訂, 點知發現有位親戚有account, 於是就麻煩佢幫我哋訂. 中間等待的時候好期待, 因為唔知呢幾間舖頭d貨係唔係同網上睇到係一樣, 二來又唔知d質地如何. 最後攞到貨後一看, 真係好滿意, 咁多件勝利品都只係大概500人民幣, 有d仲係名牌子, 香港都幾難可以用咁既價錢買到, 而且又唔洗周圍去搵, 只要上網買就得, 難怪forum d 人話會買上癮啦!

陪月

2010-05-08T16:19:00.002+08:00

而家好多人生仔都會請陪月, 我都唔例外, 我就請咗好友用過的陪月, 一來有口碑, 二來佢真係好有經驗 (做咗廿幾年). 本來諗住到時可以專心休息, 點知開始放產假後, 接到陪月來電, 原來佢唔小心整親, 隻手要做物理治療, 佢驚咁樣抱bb會好危險, 所以唔可以嚟做, 但佢都好好咁話介紹另一位陪月比我, 喺咁緊急關頭, 都冇辦法, 唯有先見一見呢位新陪月啦.

初次見面感覺一般, 唔係太穩重, 但冇計, 要照用. 雖然佢都有經驗, 但就唔係同我哋太夾. 其中有以下幾件事件:

出院那天, ddd因為驚我做完手術唔太方便, 佢又要幫我拿東西, 於是便叫陪月來抱bbb返屋企, 我哋一行四人便搭的士打道回府, 當ddd比錢時就同陪月講, 等我開門比你啦, 但係陪月就話唔使, 仲好快咁自己開門落咗車, 攪到ddd有d不滿, 因為佢想陪月專心抱住bbb, 亦顯示出陪月唔係幾聽人講.

陪月做咗大概兩個禮拜到, 有一日同我講, 想月尾請假, 話唔知佢個friend定係親戚返咗嚟, 想一齊去旅行, 話可以叫其他陪月幫佢頂嗰幾日, 仲話佢哋做陪月係咁, 有時唔得閒會叫人頂. 呢下真係有d過份, 你應承做嗰陣時, 已經知要做幾耐, 仲係唔係因為咩大事而係去旅行, 真係唔知咩叫做責任心. 但係佢咁問到, 又話搵人頂, 仲話頂佢嗰個好有經驗, 帶佢入行咁話, 我哋冇辦法下唯有ok啦, 點知後來去唔成, 因為佢哋想去土耳奇, 但咁啱地震, 所以打消咗個計劃, 但係已經留底一個極差既印象.

因為我哋有工人, 有時陪月可以叫工人幫手準備食物, 佢自己就可以照顧bbb, 餵下奶, 沖下涼咁, 而當bbb瞓咗覺後, 又未夠鐘煮下一餐時, 佢都幾清閒, 有時會攞我d育嬰書睇 (當然係冇問過就攞去睇), 有時甚至會坐喺bbb房入面張梳發"恰"下, 攪到我有時都唔係太放心, 所以我都好少會瞓晏覺.

另外, 呢位陪月都幾八掛, 有時我喺度上網或者upload d相時, 佢會行過嚟睇下, 真係完全唔尊重私隱. 有時有朋友嚟探我同bbb, 佢又會嚟搭下詘.

有次我阿媽同阿哥拜完山上嚟睇bbb, 買咗d新鮮橄欖上黎, 放咗喺枱度, 陪月見到又問可唔可以請佢食幾粒, 連我阿媽同阿哥都覺得佢唔係幾好. 當日阿媽仲比咗d拜完山既提子我, 陪月就洗比我食, 但係我見到佢自己攞咗d嚟食, 雖然我冇出聲, 但係我覺得佢係嗰d會打斧頭既人.

原先我打算請陪月做個半月, 但係當d野stable咗之後, 一來覺得工人都應該應付得來, 二來呢位陪月真係唔太夾我哋, 所以我諗住大概一個月已經夠了, 點知佢自己主動問我可唔可以早d完, 本來我都應承佢, 但後來想佢做多幾日, 因為我要去覆診, ddd媽咪嗰日又唔得閒, 我又唔放心得工人同bbb兩個, 所以問佢可唔可以多做幾日, 但原來佢又想去旅行, 仲報咗團, 咁冇法啦, 唯有當係比工人試下既一個機會, 後來佢個團唔成團, 先至做到我原先預定既日子.

陪月仲問我可唔可以幫佢寫reference letter, 當時我就支吾以對, 後來我講比ddd聽, 佢話可以, 但係佢只會寫阿邊個邊個由幾時至幾時做過陪月呢d咁factual既野, 陪月仲要求可唔可以比cash, 我最終只係開咗張冇劃線既支票比佢, 但係可能我個簽名簽得唔多好, 佢去櫃台攞唔到錢 (仲鬼死咁早打嚟問), 最後我叫佢存入戶口了事.

後來我問ddd, 如果有一日陪月打嚟, 話有人想請佢, 但係想問下之前d僱主 (因為我哋當時係咁做), 咁佢會點答, 佢就話 "如果我下次要再請陪月, 唔會請佢囉".

Academic English

2010-04-29T14:51:00.002+08:00

因為有了bbb, 所以請咗位菲傭照顧佢, 菲傭就梗係要同佢講英文啦, 但係我哋呢d話就話讀咗唔少書既人英文水準當然有咁上下, 但係我覺得只係限於文書/學術上的英文, 所以我會稱之為 "academic English", 對於日常生活用的英文, 就真係有限啦, 例如湯匙, 你知唔知英文點叫呢? 我都係問翻菲傭先知叫做 "soup ladle", 希望呢位菲傭可以幫到我練習多d英文啦!

睇醫生

2010-04-28T18:10:00.000+08:00

bbb 人仔細細, 已經喺頭一個月入面睇咗幾次醫生, 有一次仲要留院添, 不過好彩都係小事, 冇大礙.

首先係出院後既第一個清晨, 幫bbb換尿片時發覺d便便綠綠地色, ddd就好緊張咁話要即刻去睇醫生, 因為之前有人同佢講如果d便便係紅色或者綠色係好危險, 所以我哋三個大清早五點幾就番去醫院, 直上bb房. 開門的阿姐本來叫我哋去樓下睇門診, 但係ddd話bbb只係剛剛出院, 可能阿姐都覺得佢好擔心, 所以好好人咁叫咗位姑娘同我哋講, 姑娘一睇d便便就話係正常, 綠色只不過係因為bbb既膽汁顏色, 佢仲話有黏液或者係冇色就真係好危險, 就係咁我哋就被打發回家. 其實我都覺得bbb應該冇事, 因為我抱佢去醫院時仲眼仔睩睩, 一d都唔似唔舒服, 只係見ddd鬼咁緊張, 唯有陪佢走一趟啦.

bbb出院時有少少黃疸, 醫生吩咐一個星期後去覆診, 所以佢只係一星期大就要去睇醫生. 原本都唔想再睇呢個兒科醫生, 因為係醫院時已經覺得佢d態度有d輕浮, 用佢只因為係婦科醫生refer, 而且反正我都要去拆線, 佢間診所就係喺婦科醫生隔離, 加上我想睇嗰位醫生冇check黃疸既儀器, 唯有去睇佢啦.

check完後, 黃疸指數降緊, 唔洗照燈, 幾好. 不過見bbb塊面仔有少少粒粒, 陪月叫我問醫生攞定d藥膏返去看門口.

到bbb半個月大時, 半夜幫佢換片時發覺今次d便便有d紅色, 加上見佢之前哭得比平時厲害, 唯有叫醒ddd睇下, 呢位緊張大師一睇之下梗係話要即刻睇醫生, 雖然我都同意要睇醫生, 但係我見bbb都唔似有咩大礙, 所以便建議待第二朝先去睇兒科, 大家可能都估到我呢個建議當然會比人反對啦, 就係咁我哋又去番出世間私家醫院睇門診. 但係去到d姑娘話"今晚我哋冇醫生識睇咁細個既bb喎, 你哋不如去睇急証啦", 咁我哋唯有再去東區醫院睇急証, 登記完坐低, 見而家先至輪到九點至十點登記既人睇証 (當時係一點多d), 幾時先排到呀, 正當我哋打算問下有邊間私家醫院有得睇時, 就叫bbb個名, 可能佢咁細, 有得優先掛. 急証室醫生初步睇過後認為冇咩大礙, 但係最好都係仔細睇下, 就安排我哋上病房睇下, 因為儀器齊全d. 上到去, 醫生睇過後, 認為可能係肛門損咗, 但都要再觀察下, 就係咁bbb就留院一晚, 之後顧問醫生再睇過, 都話只係肛門損咗, 比d zinc cream番去搽下. 另外又見佢仲係有d眼膠, 再比d眼藥水佢 (其實出世時已經有眼膠, 個兒科醫生比咗d眼藥水佢滴, 但都唔係太大作用, 所以更加唔想再去睇佢).

以為去醫院後, 都應該無驚無險啦, 點知幾日後塊面開始出咗d粒粒, 於是就搽下兒科醫生比既藥膏, 都好似唔係好見效, d粒粒仲愈來愈嚴重, 就去睇之前想睇嗰位兒科醫生, 佢話bb仔好多時都會生呢d粒粒, 就開咗d類固醇同消炎既藥膏.

以我有限既醫學知識知道類固醇搽得多冇益, 但見佢d粒粒咁唯有試下, 但係搽咗幾日都唔多好, 我見d人話搽完類固醇好快見效, 而且d粒粒仲生到去個身到, 見唔多對路, 就再去睇ddd之前睇過嗰位皮膚科醫生, 入到去, 個醫生一睇就話係暗瘡, 係因為我d荷爾蒙過咗比佢導致的, 可能佢見我哋唔係好信, 又多野問, 就好寸咁攞本書出嚟, 指住本書名話 "小姐, 暗瘡", 跟住揭開入面d相話 "暗瘡可以係咁樣", 再揭多幾頁又話 "又可以係咁樣", 佢仲話可以等bbb身體自己慢慢排出嚟, 又話 "如果我唔比藥膏你, 你都唔放心啦", 就係咁佢開咗d藥膏就打發我哋出去. 雖然呢位醫生係寸d, 但係總算有個專業既解釋, 好等我可以同婆婆 (即係我阿媽)有個交代, 等佢唔好再叫我搽呢樣洗嗰樣.

真巴閉的內衣店

2010-04-10T10:46:00.006+08:00

昨天要去覆診, 反正要出去, 梗係要安排個緊密既行程啦, 其中最緊要的當然要修身, 雖然我唔係肥咗好多 (連醫生開刀時都話我個肚皮好薄, 唔係太多脂肪) 但係個重災區 -- 腰同臀部真係要整理一下, 否則要再添置過d返工衫, 所以要去一去銅鑼灣一間好出名既內衣店走一趟.

呢間內衣店我幾年前已經開始幫襯, 個時因為要影結婚相, 在網上見到d人推薦去呢間買griddle, 就係咁開始去呢度買野. 但係每次去都要等好耐, 因為店主會逐一為各人度身, 選擇合身的內衣, 仲會幫你改善身型添! 以前去親都要排長龍(weekday都係咁多人), 可能太多人的關係, 成日都要排出舖頭外, 為免隔離舖投訴, 條隊要分開兩條, 未能入舖內排的要到舖頭對面的商場樓梯排呢.

今次因為行程緊密, 所以吃過午飯便出發, 希望lunch time 時間冇咁多人啦, 點知去到才一點半, 已經大概有十個人在門外排隊等開門 (原來一點半先開門做生意), 等了一陣, 老闆娘出現了, 佢開門後第一件事竟然係派籌, 天啊, 估唔到買內衣都要輪籌, 不過都好, 攞完個籌可以去做其他野先返黎再排過, 但係就真係有d誇張.

意外的禮物

2010-03-26T18:51:00.007+08:00

在醫院的幾天裏, 令我最有意外驚喜的是收到一個花藍和一束鮮花.

生完bbb的第二天, 因為還要吊糖水, 差不多整天都唔能夠落床, 就係我無無聊聊想瞓的時候, 突然有位阿叔走入病房找我, 叫我簽收花藍, 那一刻真的有點措手不及, 那位送花的叔叔都好好人的將插在花藍上的咭遞給我才走, 打開一看, 初時看得一頭霧水, 再睇真d, 竟然係ddd既同事送來的, 真係有心! 不過他們都好神通廣大, 連我係幾號床位都check到, 勁呀!

話說驚喜仲未完, 再夜一點的時候, 又有人送花來, 今次係Eliza同Mandy Y S姨姨送的, 真係多謝哂! 其實我咁大個女都好少收花, (因為有人認為d花好快會凋謝) 今次仲係一次過收兩束, 搞到我好似d名人咁一房都係花! 真係多謝哂!

產檢趣事

2010-03-23T15:25:00.000+08:00

1. 婦檢變產檢
最初預約婦科是想趁著放大假去做定期檢查的, 因為我看的醫生星期六只會預留給大肚婆, 所以要放假的日子才可看, 加上她的 schedule 有點 full, 我一早便預約好了時間. 怎知將到預約的日子, 便發覺自己可能有了bbb, 這次的婦檢預約便演變成第一次產檢, 好彩一早預約了, 否則不知還要等多久才book到看醫生呢.

2. 罰企
知道有了bbb當然開心啦, 而初時我們都有點緊張, ddd還專登買了本notebook來記低醫生的吩咐等, 而我們也會在產檢前準備定想問的問題, 到見醫生時就唔會唔記得要問甚麼問題了. 平時有點cool的醫生在給我照ultrasound時, 見到ddd攞住本notebook好似被罰企似的站在一邊, 也忍唔住笑佢.

3. bbb是lego?
每次去產檢, 醫生都會做ultrasound, 但係有時真係唔係好知bbb在肚裏的位置, 有一次ddd就帶左個 lego 公仔去問醫生究竟bbb在肚裏是怎樣的, 不過最難得的是醫生竟然冇笑, 唔知其他人係唔係都試過咁樣問醫生呢?

4. 得罪姑娘
我這位醫生請的一位姑娘有時都幾惡, 話說有一次檢查要等報告, 根據以往的經驗, 姑娘係會主動打電話比我講個報告結果的, 但這一次便沒有, 唔知係因為我miss左個call定係姑娘冇打, 當我再做檢查時, 我就問醫生個報告result, 點知醫生即刻問姑娘點解冇打電話比我, 嘩, 睇完醫生, 見到姑娘有d面黑, 仲話我有責任打翻去問, 好彩ddd第一時間同姑娘講係我地唔啱咋, 因為個陣時我地仲未book醫院, 仲要靠呢位姑娘啊!

5. 究竟幾時係預產期?
當知道有bbb時, 醫生估計預產期係3月2日, 點知後來 (大約 3x週)突然同我講預產期係2月26日, 再之後去做檢查, 可能佢見bbb個頭仔都落得好底, 又話可能農曆新年前出世, 點知最後都係等到3月1日先出世, 同當初既預產期只係相差一日

6. below average / above average?
一直以來去做檢查的結果都好好, 點知去到中後期時, 醫生話bbb個肚腩仔比較瘦左小小, 叫我要飲d孕婦奶粉, 但係我聽d朋友講孕婦奶粉好鬼肥, 加上我都唔係好受得d奶味, 所以我都冇飲到, 唯有盡量食多d蛋白質, 希望可以追番個磅數, 到再去檢查時, 醫生都係話bbb仲係瘦, 問我有冇飲孕婦奶粉, 我唯有答佢冇啦, 醫生就介紹我係sogo買, 佢話聽d patient 講有幾種味道, 咁我睇完醫生就落sogo睇下啦, 最終買左奶茶味番屋企沖黎當宵夜, 就係咁樣都飲左好幾個禮拜, 都好後期時, 醫生估計bbb都起碼有六磅幾, 所以我就停左冇再飲, 加上bbb遲遲都唔出來, 我都驚佢太肥, 所以都食少左, 點知最後佢差唔多有成八磅, 真係有d估佢唔到.

手術後記

2010-03-12T16:22:00.011+08:00

相信好多女士都會同我一樣選擇女的婦科醫生, 因為唔會太尷尬, 但係亦都有好多人話男醫生會比較細心, 今次生bbb, 兩位男痲醉師都好細心, 早上一位是幫我做無痛的, 佢先作簡短既解釋, 就開始幫打針, 下午佢再來睇我時, 見我的枕頭好似瞓得唔係太舒服, 就幫我整理個枕頭 (ddd剛好去了食飯), 真係好.

到了要開刀時, 因為早上的痲醉師不能來, 於是便換了另一位男痲醉師, 這位痲醉師同樣地相當細心, 一路解釋, 一路幫我加藥, 因為半身痲醉的關係, 我上半身不由自主地顫抖, 佢就解釋話十個入面有六個都會有咁既徵狀, 又用暖風機幫我減低顫抖的感覺, 到bbb要出世的時候, 又幫忙將他推出來, 可能呢d都係佢既工作範圍以內, 但我就覺得佢非常體貼.

大家可能會問咁我的女婦科醫生呢? 其實我都覺得佢唔錯, 只係初初睇佢時覺得佢有d cool, 整體呢講佢都好好, 不過當然有d攪笑野啦, 詳情遲d再寫啦.

bbb

2010-03-11T15:37:00.024+08:00

好耐都冇update呢個blog, 除左因為工作太忙外, 我還有一個極大的project在進行中, 而呢個project的1st phase 終於係上星期一release, 就係bbb的誕生! 點解叫做bbb?因為佢爸爸叫ddd嘛.

不過bbb可能係我個肚入面太舒服, 唔捨得出來. 初初醫生估佢可能會農曆新年前出世, 真係嚇到我死, 因為我打算返工返到年廿九, 而且仲有大把工作要完成, 嗰個禮拜真係事事都小心奕奕, 仲要ddd每日都車我返工同放工, 我地成日又同bbb講唔好咁快出來住呀, 要等到農曆新年假後先好出來呀, 因為d醫生費會好貴,結果, 佢又好聽話咁係我個肚入面過新年.

如事者, 等呀等, 等到年初九醫務所開工去復診, 醫生見到我就話點解阿b咁耐都仲唔出來呀, 你要book定催生喎, 就係咁, 又等到要催生的日子, bbb都唔捨得出來, 於是就要入院接受催生.

入院前當然要沖翻過靚涼啦, 食埋晚飯就出發去醫院, 做完d check up 後就入病房settle down, 之後護士就幫我塞藥, d藥可能會令我有肚痛既感覺, 就係咁過我在醫院的第一晚.

到第二朝, 姑娘問我有冇肚痛, 我就真係一d感覺都冇, 所以一早就要入產房打催生針. 由於太早, 我早餐都未食就入產房, 好彩姑娘准我係產房入面食野, 如果唔係實餓死我. 大概一個鐘頭後, 醫生黎睇我既情況, 佢幫我穿水, 希望bbb可以快d出來. 我同ddd就係咁在產房入面等左成個朝早, 好彩入面有部電視可以解下悶, 而我就睇下瞓下咁等, 等等下開始覺得痛, 痛痛下唔想再忍, 於是就叫姑娘幫我叫痲醉科醫生做無痛,做無痛後只係覺得有子宮收縮, 真係唔覺得痛, 真係唔錯, 不過每次d藥力只可維持到兩個鐘頭, 過左要再加藥.

就係打左無痛下, 又等呀等, 醫生下午時又黎睇我情形, 佢話子宮只係開左2度, 如果開到3度後就應該好快去到10度, 咁我唯有繼續等, 等緊既期間, 聽到隔離房有人生, 雖然佢唔係叫左好耐, 但係d叫聲就有d駭人, 搞到我都有d驚同後悔點解唔一早開刀, 但係都唔理得咁多, 希望bbb快d出來.

姑娘再幫我檢查時, 話我開到3度, 咁我就開始好期待10度的來臨, 但係等下等下, 姑娘話我宮縮的情形唔錯, 但係就只開得3度, 後來姑娘就話我宮頸腫左, 咁既情況下, 通常都唔可以再開, 於是佢地就同醫生滙報, 仲開始幫我做手術前的準備. 由於我既唔係咁緊急, 所以要等醫生睇完証先可以過來幫開刀, 好彩做左無痛, 如果唔係就要痛住咁等佢幾個鐘, 期間ddd都有打電話去問診所姑娘醫生仲有幾多証要睇, 但係就只得一句仲有証要睇.

最後都等到醫生黎, 檢查過後都係需要開刀, 於是我就被送到手術室, 由於唔係第一次接受手術, 所以我都唔驚. 而且因為已做了無痛, 只需在之前已插好的導管再加藥便可半身痲醉, 但係因為屬於緊急開刀, 所以ddd就唔可以入手術睇住.

手術開始左無耐, bbb就出世了, 佢既喊聲都幾洪量, 姑娘幫佢清潔後就抱過來給我看, 問我係仔定女, 姑娘話佢d眼睫毛好長添, 仲叫我親他一下, 姑娘又抱著佢親了我一下, 佢個身好暧呀, 跟著佢就要被抱去度高磅重同沖涼, 而醫生就幫我縫針, 磅完重, 姑娘打電話翻黎滙報, bbb重3.58kg, 即係7磅14安士, 差2安士就8磅.

最係縫完針, 姑娘再幫我量血壓, 吊糖水, 就送我返病房, 成個手術大概一個鐘就完成了.

新年進步

2010-01-01T10:33:00.004+08:00

轉眼便踏入2010年了, 昨晚在觀看電視直播國金煙火時, 看見國金外牆打出2010字樣時, 忽然發覺2010年是由我的出生月日 (10月20日)所組成, 好期待 20/10/2010 呢個日子啊!

回顧2009年, 真的忙透了, 甚至有點透不過氣來的感覺, 所以都鮮有update呢個blog, 不過都已成為過去式了.

希望新的一年大家都開開心心, 身體健康, 而我自己就希望可以做到 work life balance.

日頭唔好講人, 夜晚唔好講........

2009-10-13T00:06:00.003+08:00

唔知大家細個o個陣時, 有冇聽過"史豐收速算法"呢? 係一種用手指作運算的快速計算法, 由一位叫 "史豐收" o既中國人所發明, 我記得當時佢仲有o黎香港作示範表演, 而我就係咁就買o左佢本書. 最後本書梗係比我打入冷宮啦. 不過有一次我返娘家搵書時比 ddd 見到呢本書, 佢先知有一種咁o既速算法, 仲問我借o黎睇.

昨晚和 ddd 租完碟行番屋企時, 不經意提起呢種速算法, 點知........

好驚呀, 今日上網睇新聞時見到史豐收死於心臟病的消息........ 點解 halloween 都咁邪架

有興趣想知多d, 可以去下面個 link 睇下
http://maths.cpss.edu.hk/quickcalC2.htm

語出驚人

2009-09-14T23:32:00.002+08:00

這天約了 ddd 的表哥一家和姑媽食晚飯, 其實我們都很喜歡表哥的一對寶貝兒子, 其中小兒子今年讀 k3, 所以表達能力還不太好, 這晚我發現他的額頭有個小小的偒口已經結了焦, 就問他怎樣弄的, 點知佢就用好無辜的語氣話, "我同 xxx (他的同學名稱) 玩時, 我用架車車佢個頭之麻, 佢就用個玩具打我個頭", 我估佢係用架車"轆"佢同學個頭, 但如果佢大個左後知道個"車"字其實係好暴力咁解, 唔知佢自己會唔會笑翻自己呢?

其實呢位小朋友已有很好笑的前科, 有一會在他家吃新年飯, 佢爸爸沖了一杯提子汁比佢, 點知佢掛住玩飲管唔食飯, 爸爸就拿走了他的提子汁來飲, 誰不知佢就用不滿的語調話佢爸爸係小偷! 真的好攪笑!

有趣車牌

2009-08-23T23:09:00.002+08:00

之前同大家講過自從政府推出自訂車牌後, 在街上時不時會見到d得意車牌. 昨天又比我見到一個非常有趣同有創意的車牌, 今次仲影埋相比大家睇下.

倒數

2009-06-12T23:16:00.002+08:00

大家見我個blog成個月都冇update, 都係因為太忙, 又要搬office, 又有大堆project, 想寫都冇咩心機同精神. 到今日終於update了, 因為我可以倒數放大假了!

雖然冇外遊打算 (因為ddd冇放假), 但我打算可以趁住呢個機會可以去探一下好耐好耐冇見既朋友, 執下屋, 尤其係娘家, 因為已被阿媽投訴冇位擺野 (只因有位喜歡購物的哥哥), 去下睇LV展, 挪亞方舟, 仲要做下小手功送比人, 希望可以完成咁多樣野啦. (我估因為ddd要返功, 可以迫我都早d起身, 唔會白白浪費左個假期)

徤康小食

2009-04-11T23:12:00.005+08:00

大家應該對相中的老人家很熟悉吧! 我估大家都係佢出既麥皮而認識他, 我都唔例外, 但係我就冇食過, 除左係外貎唔討好, 我都唔係好飲得牛奶, 更加令我對麥皮抗拒.

這天剛好到 Jusco 逛逛, 見到有promotion counter, 初時以為係 cereal, 睇真d原來係用燕麥做的小食, 仲有幾款口味, 一試之下又幾好食喎, 於是便買了一包返去, 如果大家見到都不妨試一試.

清明拜山(三) - 向高難度出發

2009-04-05T02:07:00.011+08:00

每年去完低同中難度處拜山後, 都會你一言我一語咁討論去唔去高難度處拜, 佢地叫那處做"高山", 有時大家見時間太晚, 天氣不好, 或者冇人想去就未必會去, 但都會朝高山的方向遙遠拜祭. 叫得做高山, 梗係唔小野啦, 雖然有人同我講個度其實唔係太高, 大概係半山度, 都要行一段山路, 但我就有小小擔心, 所以我咁多次都未去過.

不過今次見天氣又唔係太熱, 於是便膽粗粗地跟埋去, 我地一行三個人, 冇錯, 由最熱鬧時的十四個人, 最後淨番三個人向高難度出發. 一開始其實冇咩野, 綠草如茵, 好似去郊野公園咁, 都幾ok. 不過途中有一處有人住的帳篷, 會有一群野狗, 所以要小心那些狗會跟在尾後. 行行下, d路開始有少少斜, d草都開始比較高, 不過都仲可以接受, 但係行下行下, 其實都已經唔似一條路, 有時要小心睇下你下一步要踏去邊先安全, 好彩我攞住把遮當做手杖, 可以插入d泥度借力, 但有時都要抓住d植物以防萬一. 行行下會開始見到d碎了的花崗石, 好似以前屋企用黎鋪地的地磚花紋, 我地走個陣時都執了一舊返去.

最終到達目的地了, 由起步開始計都只係用了二十分鐘的時間, 但係我估今次已經係比較好行的了, 因為佢地話可能舊年的山火真的是比較厲害, 所以d草都比較疏, 佢地以前試過找好耐都找唔到個墳, 不過因為d樹燒過, 行上去後才發現條褲, 鞋, 手咁都被d燒過既植物弄得很污糟.

雖然過程有少少艱辛, 但係上面的風景又真係幾靚, 望番落元朗, 令我記起小學時讀過的 "香港山多平地少, 而最大的平原係元朗". 遠望下, 又見到我地左手面又有山火, 仲好大煙添. 本來我地叫埋ddd表哥一齊去, 後來佢叫我地今日唔好上去, 因為係正日, 會有很多人拜山, 隨時有山火發生, 好危險, 如果上到去又遇到山火, 真係唔知點走. 連一個做漁護署的表哥都叫我地唔好去, 我地可以平安回來真的好彩, 不會下次我真係要諗諗再上唔上去啦.

清明拜山(二) - 最熱鬧

2009-04-05T01:46:00.006+08:00

去完中難度, 我地便往低難度那處出發, 之所以係低難度, 因為那處只需要經過幾處山墳便到, 沿途都只是一些小斜坡, 你睇下連小朋友都去到便知啦, 所以呢度都通常會最熱鬧.

雖然有小朋友係會比較熱鬧, 但係都要費神睇著佢地, 因為見到你燒衣, 又會想燒埋一份, ddd 唯有等 d 火細 d 時先比佢試下, 點知佢爸爸見到就唔準. 不過小朋友總有佢地既辦法, 你睇佢靜雞雞又攞支香去燒.

因為每年都要掃把來清理一大堆落葉, 所以通常都會留底等下次用, 你睇唔睇到下面幅相裡面的兩把掃把呢? 唔知咁樣擺法, 重陽再去時重係唔係度呢?

清明拜山(一) - 山火呀

2009-04-04T22:16:00.010+08:00

又到清明, 今天要入元朗錦田拜山, 由於ddd的袓先很早已在香港落地生根, 所以有好幾處拜山地點, 從地點的容易到達程度, 可以分高, 中, 低三級, 以我去過幾次的經驗, 大家通常都會由低難度開始, 最後先去高難度那處.

今年的次序有點不同, 先由中難度開始, 其實我認為屬於中難度係因為要經過一堆高至及腰的草叢才到達目的地(見下圖), 老實講, 以我一個城市人, 如果唔係跟ddd去拜山, 我都好少會同大自然有咁親密的接觸.

經過去年重陽節的一番苦功清理大量野草 (還記得我較早前講過多到好似成幅草皮嗎?), 今次比較容易清理, 趁著男丁們正在清理的時候, 加上今日天氣都幾好, 冇落雨, 又唔會太曬, 我便拿著相機周圍影. 由於今日係正日, 所以都有好多人在附近的山頭拜山.

當男丁們清理完畢後, 我們開始擺放各樣祭品準備拜祭之際, 附近的山頭就傳來噼靂啪喇的聲音, 一看之下見到有煙, 初時大家都不以為然, 點知冇幾耐就見到有火, 那班拜山人士都有嘗試用火拍救火, 但唔成功, 而且火乘風勢, 越來越大火, 最後他們都好像放棄了. 由於當時的風勢比較大同無定向, 於是我們都加快手腳, 以免被波及. 嘩, 我都係第一次同山火咁近距離, 加上出入都要經過那堆草叢, 並冇石屎路, 如果真係燒到埋黎, 都唔知點走!

其實今日都反常地比較乾燥, 加上又有d咁唔小心的拜山人士, 我地今日都時不時聽到救火車的聲音, 聽新聞講今日總共有七十三宗山火, 其中六十一宗就係新界發生, 真係辛苦哂d救火員.

做到成隻牛既牛年

2009-03-31T00:36:00.002+08:00

今年係牛年, 亦都係大家所謂百年一遇既金融海嘯, 雖然經濟大倒退, 但係我地呢d做小二的, (即係專責睇數的) 今年沒有因為生意不好而清閒下來, 反而好似今年的生肖一樣, 做到成隻牛咁, 轉眼第一季已經過去, 回歸呢三個月, 簡直有打扙一樣的感覺, 先是因為架構轉變而要變動舊年底定好的budget, 接著又要同 IT 做 project, 又要 set 今年的 target, 第一季未完又已經要做未來十八個月的 forecast, 有時忙到冇辦法靜下來好好想一想下一步該怎樣做才最好, 每日都好似救緊火咁, 睇來今年的日子都會忙都飛起.

丁蟹效應

2009-03-31T00:16:00.003+08:00

今晚無線播出新的鄭少秋劇集, 一早已經有人話股市又會大跌, 雖然今日真的大跌了六百幾點, 不過我個人就覺得兩者冇咩關係, 如果真係咁, 咁鄭少秋自己係呢幾年係股市度賺唔少, 仲洗唔洗咁辛苦拍劇呀.

不過話時話, 我由細細個開始已經鍾意睇鄭少秋的戲, 但奈何當年播"書劍恩仇錄", "倚天奢龍記"時年紀太少, 完全冇咩印象 (可能都冇睇過), 唔知經典台幾時會重播呢? 我估我想睇唔多唔少都係因為d主題曲好好聽, 好有武俠劇 feel

逐個捉

2009-03-01T01:05:00.004+08:00

唔知大家以前有冇睇過呢套電視劇呢? 我就記得細個時覺得套戲好恐怖, 淨係個片頭已經覺得係一套鬼片, 一間外貌陰森的大屋 (畫出來的), 大門慢慢打開, 忽然行雷閃電, 再黎一首生命交響曲, 跟著屋入面有槍聲, 裏面的人大叫, 然後出現石堅的樣, 又有人狼叫聲, 我估十個有八個小朋友都會有d驚. 而我都冇睇哂, 只係記得一班人係間大屋入面走唔到, 同埋有d恐怖既事發生咁.

不過最近無意間發現經典台重播, 睇下睇下原來一d都唔恐怖, 而且仲有d無聊同攪笑添! 故事講有班同娛樂圈有關既人受由石堅飾演既電影大亨邀請到一個獨島上的大屋, 呢班人各有目的, 有d想叫石堅比佢地做男女主角, 有d就想借錢拍戲, 但係石堅突然失縱, 而唯一的一首遊艇壞了, 大家被困在島上後發生的一連串怪事, 一d都唔係細個時想像中的恐怖. 不過唔講唔知, 套戲原來係杜琪峰拍的, 真係估唔到, 剛追完珠光寶氣, 再睇翻年輕時的李司棋真係幾靚!

吊腳的至紅熱點

2009-02-20T00:23:00.005+08:00

記得九龍灣的Mega Box開幕時自稱為至紅熱點, 不過呢個熱點都幾吊腳. 當呢個熱點落成後便成為我公司另一個大本營, 很多後勤部門都搬了去那裡, 包括 training, 所以我有時都要到那裡.

其實未搬去熱點前, training都是在九龍灣的, 但它便在地鐡站附近的德福大廈, 話雖如此, 想當年我住西區時, 唯一返工會遲到的便是去 training, 因為實在太遠太麻煩了, 為了確保交通暢順, 我只好選擇搭地鐡而唔搭隧巴, 首先我要搭巴士去地鐡站, 到北角轉將軍澳線, 再要到油塘轉油麻地線, 而且有時又要等車, 所以每次我都已預起碼一個鐘頭先可以去到. 搬左去 Mega Box, 仲要搭多程 shuttle, 第一次去時, 又要去搵下個shuttle站係邊, 去到時, 嘩! 乜咁多人等車呀, 真係搭車搭到傻!

雖然而家住北角好了一點, 但對於去 training都仲有點陰影 (雖然而家唔需要"打咭"報到). 呢兩日又有機會 training, 第一日我比平時早了十分鐘出門, 去到九龍灣站都只係8:17到, 見仲早, 就去左 seven 買定d上堂提神必備 - 糖同水, 然後再行去搭shuttle. 有新發現喎, 原來佢地朝早返工時間的 shuttle 只會比我地公司同事搭, 唔知係早定係呢個措施有効, 條龍短好多, 去到 Mega Box 都只係 8:35 到.

不過 ddd 忽然有個驚人發現, 原來有架巴士由北角直達 Mega Box, 加上第一日的 training 同同枱同事傾開, 佢以前住鰂魚涌, 都係搭呢架巴士, 而且仲好快添 (因為行東隧, 朝早一d都唔塞), 於是第二日的 training 就試搭, 雖然個巴士站比較遠, 差不多十分鐘路程, 大概13分鐘一班車, 我等到8:15先有車到, 不過又真係好快, 返到去都係8:35, 又唔洗轉咁次車, 真係好, 以後去熱點都唔洗再咁煩.

後話:
1. 雖然呢架巴士真係幾方便, 但係d車就比較舊d, 回程時仲遇上架正在測試自動報站系統, 不過我覺得廣東話同英文既發音好似聽緊快譯通咁, 有d攪笑.

2. 呢個熱點weekday除左 lunch hour 外, 一d都唔熱, d 舖頭都冇咩人行, 真係連蚊都冇一隻, 真係唔知點生存. 我覺得佢最大的好處係有個無敵大海景 (不過聽講好曬), 但係前面仲有一幅空地, 隨時連呢個好處都冇埋!

唔駛驚

2009-02-10T00:42:00.006+08:00

星期日跟阿哥同阿媽去睇左麟右李, 點解少咁一個? 因為有人冇興趣, 而咁啱又有阿仙奴睇. 今次係紅館裝修完之後第一個show, 順便體驗一下係唔係靚左同舒服左.

首先係d櫈由以前的膠櫈改為比較高背的布櫈, 不過我覺得有少少吊腳, 但都幾舒服. 另一樣我幾欣賞的改進就係在樓梯邊加上營光線, 就算睇睇下concert要去洗手間都唔怕义錯腳.

好了, 講番個concert先, 未開場前, 坐後面位叔叔好似有戴望遠鏡, 比佢望望下見到原來特首, 霍震霆, 何鴻新都係坐上客, 咁我又攞個相機出黎zoom下, 又好似真佢地喎.

終於開場了, 先來一連串快歌, 包括主題歌"唔駛驚", 跟著再來經典金曲"幻影"等. 如果你以前曾經睇過佢地既演唱會, 相信都會知道d觀眾會係農曆新年期間比利是佢地, 譚詠麟就稱之為"祈福", 而佢今次亦做好準備, 揹定個大袋, 而d觀眾反應亦好熱烈. 不過原來佢地收到的利是係會捐比四川大地震的重建基金, 都幾有意義.

另外大家都可能係報紙見到李克勤好努力咁練大隻谷胸, 本來都覺得有點怪怪的, 但現場睇原來好攪笑, 佢地兩個好似玩健美先生咁猛擺post, 再加上錢嘉樂, 真係好好笑.

可能係年尾既東亞運動會有贊助今次演唱會, 而且咁啱當晚係倒數三百日, 所以一班香港代表隊都有上台, 仲有兩隻吉祥物添. 不過可能佢地要加入運動既概念, 有幾首歌要跟運動拉上關係, 呢part就一般般啦.

總括而言, 我覺得上一個左麟右李好睇d, 不過都冇所謂啦, 因為我都好鐘意聽佢兩個d歌, 而且農曆新年可以睇下show, 開心下, 笑下好幾好呀! (不過我發覺我部DC都唔錯喎, 影d相都幾清)

估你唔到

2009-01-28T12:21:00.002+08:00

你有冇試過發現自己阿媽原來都會識一d你以為佢唔識既野呢? 事源昨天回去拜年, 剛巧看到J2播緊日本片叫做星級大改造, 主角有織田裕二和柴咲幸, 我本身就好鍾意睇織田裕二的戲, 見到有佢做就望多兩眼, 點知阿媽係廚房出黎, 見到就問佢係唔係織田裕二, 嘩原來佢都知佢叫咩名咁厲害!

另外有一次出街, 講講下問佢知唔知早晨英文點講, 原來佢識喎, 咁再問下午安點講, 佢又識, 咁又問下佢晚安點講, 佢初初都唔知, 不過諗下諗下又講得出, 原來佢係聽到d看更, 護衛員同d外國住客講, 聽得多就識. 真係估佢唔到!

財神到

2009-01-24T16:52:00.004+08:00

上回講到我地以前傳統唔派利是封, 但係反而會派財神畫像, 我相信大家都應該見過, 因為我地個財神都印左好多年, 而且d商舖通常都會貼出黎, 係上面寫初幾啓市. 講起呢個財神, 好似我地公司好耐之前曾經拍過一個廣告, 有一戶人家掛了我地的財神畫像在家中, 跟著由梁醒波扮的財神就由畫像化身成為真人, 同大家恭喜一番.

其實我地以前除左派財神畫像外, 仲有派一款好似叫何姑的女畫像, 當然大家都比較喜歡財神, 所以近年都冇再印何姑畫像了.

除了大家常見的畫像外, 我地另外有一款卷畫形式的財神, 好似用布做的, 但只會送客用的, 應該係大客戶先有的. 另外仲有一款係用硬咭紙做的, 就是相中這款, 我就比較喜歡這款, 冇咁老套, 平時只會送客用的, 但今年好好彩地得到一個, 可以順便裝飾一下屋企.

利是封

2009-01-10T00:39:00.015+08:00

聖誕剛過, 農曆新年又將至, 今年為響應環保, 匯豐停派利是封, 相信都會影響唔少人, 好彩我地結婚後貪得意印左好多自家design的利是封, 好似有成二千封, 所以都有排用!

不過唔知點解我今年就收到好多自己公司出品的利是封, 因為我地傳統上係唔會印利是封的, 話說我地創辦人之一善伯某日見到一位老人家在街邊賣利是封, 善伯就認為如果我地派免費利是封比客戶的話, 會影響d靠賣利是封糊口的人, 所以就冇呢個傳統.

不過近年我地都開始印, 初初只係為小朋友戶口或者係Prestige戶口的客戶印利是封, 到呢兩年則連corporate客都有. 大家睇下右面幅相入面既兩個利是封有咩唔同? 答案等陣先講.

除了當年為小朋友戶口的利是封以卡通做主題比較特別外 (因為試過在利是封上印了燈謎比小朋友猜, 但已絶版冇再印小朋友利是封), 最最最特別就要數我地 Division 舊年開始自己印的立體財神利是封, 據聞係老闆親自設計, 首先是開封處有個金元寶, 一打開就見到個財神企係度向你恭喜發財, 其實所謂既立體, 就好似個d立體賀卡咁後面有紙條支撐住. 下面既利是封是舊年印的, 所以比較落本, 連個packing都靚過人, 十個一小畣. 但係今年環境唔同, 慳家d, 只係用紙條封開一紮紮, 而且紙質都好似冇上年咁靚, 聽講老闆落左命令, d財神利是封只會派比客, 如果比佢發現有人自用就抄牌, 不過呢, 我今日就從特別渠道收到一疊! (大家唔好打我主意, 我只會作收藏用)

講左咁多, 唔知大家知道個兩個利是封有咩唔同未? 要開估啦...
...
..
..
..
..
..
..
..
..
..
..
..
..
..
..
..
..
..
..
..
..
..
..
..
..
..
..
..
..
..
..
..
..
..
..
..
..
..
..
..
..

答案係: 一個係比Prestige客, 而另一個係比Corporate客的 (商伴同恒係我地 corporate個 logo)

開車門要小心

2009-01-06T22:41:00.002+08:00

除左過馬路要小心外, 大家開車門時都要小心!

事源昨天放工時到超群買麵包做早餐時, 忽然聽到一d怪聲, 然後有人叫, 再睇睇出面, 原來一架私家車的司機位車門被一架要埋站的巴士撞到一百八十度翻左, 玻璃窗好似冇碎, 亦好彩冇人受傷, 個私家車司機就罵巴士司機點揸車. 當然後來係點我唔知道, 不過我估要叫拖車, 因為個司機位車門咁樣撞法, 雖然機件冇壞, 但係冇左道門都好危險.

後來我同ddd研究係邊個唔啱, 我地都覺得應該係個私家車司機, 我估計係因為佢冇睇清楚有冇車黎緊就開車門, 結果就搞成咁, 所以大家以後都要先望下有冇車黎緊先好開車門呀.

新年行大運

2009-01-01T23:49:00.008+08:00

前陣子從報紙看到李樂思帶團行龍虎山, 途經一些戰時的松林炮台, 於是便趁著新的一年開始, 天氣又好, 便約了我哥哥一起去行山.

其實龍虎山便在娘家對面, 之前已聽阿哥講過可以由那裡行上山頂, 但一直都未試過, 今日就膽粗粗試下. 我們大約兩點半開始, 從蒲飛路油站旁的一條樓梯為起步點. 開始的時候就已經有點辛苦, 因為那條樓梯又長, 每級樓梯都比較高, 行完那條樓梯已經出哂汗. 本以為跟著的路會好行一點, 點知前面是一條又一條的樓梯, 已經好努力的行了, 但令人氣餒的係途中遇到的人都是向下行的, 心中已暗暗叫笨, 不過回頭又唔係咁好, 唯有繼續.

行了大約半個鐘頭, 遇到有分叉路, 常理話比我地聽向上行的樓梯係去山頂, 而向前行的平路係去香港仔, 於是又是一段又一段的樓梯, 不過我地遇到一位嬸嬸 (佢係向下行的), 佢一見到我地就好熱情咁同我地講新年快樂, 佢聽見我阿哥打電話比朋友confirm係唔係咁行時, 又好熱情咁同我地講繼續向上行是往山頂的.

行下行下又遇到一位伯伯 (唉,佢又係向下行的), 佢見到我地就問點解而家先開始行呀? 講講下, 佢忽然表露身份, 原來佢係"龍虎山郊野公園晨運之友會"的主席, 真係佢唔講我地都唔知有個咁既會, 佢仲話個中藥園係佢自己整的, 又話佢將幾條山路都拍了下來以便介紹給大家, 其中一條係張保仔古道, 又話漁農處同區議會雖然支持佢呢個會, 但從來都冇出過錢或出過力咁講, 又話會同旅遊業會合作推介呢個龍虎山. 我阿哥就問佢係由邊度做起點, 原來佢係大道西住, 今日就先搭車去山頂, 再行番落黎, 仲話今日山頂落山好塞車, 佢咁樣行落黎仲快!

同呢位權叔 (返屋企上網查到的)告別又再開始向上爬, 行下行下終於到了松林廢堡, 因為太多樓梯, 已經很累了, 見到往山頂的方向又係條樓梯, 我就話唔好去山頂啦, 本打算改去旭龢道便打道回府, 點知行下行下見到去山頂的路變番一條比較舒服的斜路, 咁先係路家麻, 咁我地又往山上行了.

呢條斜路終於都比較正常, 因為除左向下行的人外, 仲有好多人都一齊向上行的! 最終再行了大約半個鐘便到了山頂的盧吉道, 再行一段平路便到了山頂廣場, 更在那裡遇上要好的舊同事(她便是曾同我阿哥做過同事的那位)和她的小朋友, 我地更一起去了買雪糕食添!

雖然今天的行程比較辛苦 (我以前讀中學時每年都有由學校行上山頂的籌款活動, 但那時的路線冇咁鬼多樓梯的), 而家都feel都有d腳痛, 但係作為新的一年開始的活動, 都是好健康的!

新年快樂

2009-01-01T00:12:00.002+08:00

新年快樂! 眨下眼就踏入2009年, 剛從電視直播看了IFC的煙火, 雖然很美麗, 但新的一年會像煙火般美麗嗎? 我相信冇人夠膽擔保, 但我覺得香港過去經歷了這麼多風浪, 應該懂得去處理和應變, 希望逆景很快便會過去.

正所謂一年之計在於春, 我希望新的一年可以戒除懶散的陋習, 工作上有所進步(包括早d收工), 身體健康.

究竟係傷風定係鼻敏感?

2008-12-24T01:00:00.005+08:00

繼上星期初喉嚨非常痛後, 有少少咳, 於是便趁放埋個d消防假前去睇醫生, 希望食定d藥, 咁個假就唔會因為病倒而浪費了. 誰不知d咳反反覆覆咁, 時好時壞, 星期日個日仲咳到死死下. 咁星期一返工便轉去睇耳鼻喉醫生.

因為我有鼻敏感, 所以都睇左呢個耳鼻喉醫生好幾年了, 過往去看他都係天氣轉變而令鼻子很不舒服. 但試過有一次因為咳和喉嚨痛去看他, 他竟然話我係鼻敏感, 真的有點無可奈何, 但吃了他的藥後又真的好了點.

今次見睇左一個醫生都唔好, 唯有再去看他, 果然不出所料, 他又係話我因為鼻敏感, 我心有不甘地問佢好似係傷風感冒喎, 佢問我咁你有冇發燒呀? 咁又真係冇乜, 佢就話傷風同鼻敏感好似, 因為我的鼻子紅腫, 令到呼吸唔暢順, 瞓覺時可能用了口來呼吸, 引致喉嚨不適, 加上鼻水倒流, 感覺就似有痰, 亦會令人咳, 佢咁講都好似好有道理, 而且他的藥又確實令我"感覺良好", 但係我真係攪唔清咁究竟幾時係傷風, 幾時係鼻敏感呢?

星期三放假做乜好? (Part 3)

2008-12-19T01:11:00.008+08:00

剛剛的星期三放假就去了位於筲箕灣的海防博物館, 之前已經聽朋友講過呢個博物館都幾好睇, 結果真的不錯.

我們大約兩點鐘地達, 本來都唔係好知點行好, 點知聽到廣播話十五分鐘後有導賞團, 經過上次去香港歷史博物館的經驗, 有導賞員的介紹係好好多, 咁我地就又去join左, 話說海防博物館原身係鯉魚門砲台, 係英國人係1887年建成的, 當時黎講d軍備都幾先進, 連魚雷都有.

不過後來d英國人覺得香港唔需要咁強既軍備, 所以就停左冇再update, 就係因為咁, 係第二次世界大戰時香港不堪一擊, 在十八日內宣佈失手投降, 而呢個砲台更在半日內宣告投降.

完成一小時既導賞團後, 本來想再周圍行行下, 點知廣播又話十五分鐘後有個古蹟徑既導賞團, 於是乎我地又去join左, 原來呢個海防博物館分開室內同室外兩大展區, 古蹟徑就係室外的, 導賞員會帶你從山上的砲台向山下走到海邊, 沿路可以參觀唔同既大砲, 彈藥庫, 溝堡(見左下圖), 被炸毀既軍營(竟然有棵樹可以生長在壁爐)等等, 仲可以見到一d戰火遺留下來的痕跡添!

其實個導賞員話比我同ddd知, 我地可以連續 join 佢地室外同室內既導賞團可以好全面咁認識呢個博物館, 原來佢地只會係星期三, 六同日先會有咁既安排, 平時要分開上下晝呢!

最後我地都好满意呢個行程, 一來個導賞員講解得好好, 仲好個上次歷史博物館, 而且室外的風景好靚, 又可以走到海邊, 我見有d人專程走來到海邊坐, 而佢另一個好處就係可以有三個鐘免費泊車 (雖然今次我地係搭巴士黎), 我地都幾肯定會再來的.

星期三放假做乜好? (Part 2)

2008-12-18T12:42:00.006+08:00

我地行完香港歷史博物館後都只係四點幾, 於是便去對面的科學館行下.

我以前都有去過, 當時都覺得d展品幾得意幾好玩, 但係而家再睇翻, 一來舊, 二來得意程度大減, 真係冇咩睇頭, 我估如果帶埋小朋友黎既話都應該還可以, 但係兩個大人去就明顯冇咩好玩, 有d展品(好似幅相入面模擬雀仔眼睛)同我上次好多年前都仲係一樣, 而且又保養得唔係幾好. 今次我只會推介頂樓既一d智力遊戲.

星期三放假做乜好? (Part 1)

2008-12-18T01:30:00.009+08:00

如果大家有追看我的blog, 應該仲記得我為了要清假, 所以有點似返消防, 今天起一連三天是我要清的最後三日, 咁係呢個咁低迷的環境下去邊好呢? 以下有個好介紹.

假如你是在非公眾假期的星期三放假的話, 你不妨去下博物館, 因為逄星期三都係免費的, 我便用了兩個星期三去了香港歷史博物館, 科學館同海防博物館.

先講下香港歷史博物館, 唔好以為係沙田, 其實係尖沙咀科學館對面, 而家展緊香港的歷史, 本來我地想借部導賞機, 點知要錢的, 好在職員同我地講等多一會便有導賞團, 於是我地就 join 左個團, 呢個展覽第一部份有d悶, 因為講幾千年前的香港, d展品十足十以前讀歷史時個d北京人!

不過跟住的部份都幾好, 有介紹香港主要的文化, 如圍村的祠堂, 客家人的屋, 長洲的包山, 飄飾, 神功戲, 水上人的艇等, 又有香港一d特色, 如舊式茶樓, 茶葉舖, 什貨舖, 當舖, 銀行, 涼茶舖, 工展會等等, 睇得出d展品都幾落本做.

除左展品外, 仲有放映廳播放翻d以前既片段, 我都係睇個d片先知有一次打風(溫黛)打到而家住緊既隔離街, 即明園西街d車被雨水沖埋一堆, 好誇張!

廣東話

2008-12-16T00:12:00.002+08:00

有些認識我的朋友應認知道我係潮州人, 仲要係正宗個隻, 即係我阿爸同阿媽都係潮州人, 由於佢地會係屋企講潮州話, 所以我都識聽但係唔太識講. 我最多只會識講一d生活用詞, 因為由細到大都聽同講某d用詞, 所以有時都唔係太習慣廣東話點講. 以下就係一d例子:

例子一: "羅"毛巾
佢我屋企, 從來都冇人用過呢個"羅"字黎形容洗毛巾, 潮州話個音係叫"灼", 所以我到而家都唔係好慣人地叫我幫佢"羅"條毛巾比佢, 反應係會比平時慢半秒

例子二: 粉絲
另外一個經典例子係粉絲, 即係乜乜粉絲煲個d粉絲, 相信大家都有食過. 潮州人的叫法譯番做廣東話就會變左做"豆粉", 我又係由細到大屋企都叫粉絲做豆粉, 當然對於我地呢d時不時會出街食飯既人黎講, 就梗係知廣東話叫做粉絲啦, 但係我阿媽就好少出街食飯, 就算食飯都會係我地叫餸, 佢就未必留意到. 話說有一日, 屋企既粉絲食哂, 於是我阿媽就去超市入貨, 點知搵黎搵去都搵唔到, 唯有去問下d職員"豆紛"放係邊, 個職員就帶佢去擺放用黎打芡用的豆紛 (我估係馬碲粉掛) 的貨架, 我阿媽一看就同個職員講唔係呢d, 我都唔太清楚佢後來係點先令個位職員明白佢係要粉絲, 我淨係知佢係到個時先知廣東人係叫粉絲, 不過佢而家仲記唔記得就好難講

例子三: 一粒橙
相信大家都會用"個"字黎做生果既量詞, 但係潮州人就會用"粒"字, 尤其係用黎形容橙既時候, 所以我有陣時有意冇意咁用左個"粒"字呢!

駱駝吸水時

2008-12-15T23:59:00.002+08:00

咩叫做駱駝吸水時? 哈哈, 因為我平日不是飲得太多水(其實係飲茶比較多), 試過大半日唔飲水都唔覺得口渴, 所以有人話我係駱駝.

不過近日因為喉嚨不適, 唔飲水簡直有火燒既感覺, 尤其係夜晚瞓覺時, 所以呢幾日都飲左好多水,飲到我好飽, 一肚都係水呀!

天使蛋糕

2008-12-09T00:17:00.002+08:00

美心最近推出了天使蛋糕, ddd一直都好想試, 但苦無機會, 昨天終於藉著替ddd表哥的兒子慶祝生日, 買了一個試試.

我們是打完邊爐後才切蛋糕的, 初時我都有點擔心大家食得咁飽, 食唔落個蛋糕, 而且個蛋糕白雪雪咁, 驚d小朋友唔覺得吸引. 點知大受歡迎, 全部食哂, 小朋友就連碟上的cream都食得好乾淨, 真係好!

不過美心的天使蛋糕跟阿蘇介紹的那個 (即刻以前中環city super有得賣那個)比較下, 都係阿蘇介紹的好味些, 先講那些crunch, 美心的份量比較小, 而且每位的size都比較細, 但係味道就不太甜, 都唔錯. 至於蛋糕本身, 美心就未夠 spongy, 不過佢d cream就唔會太多但帶點 "蘇"味, 女士們應該可以接受. 而美心的每個磅半, 但阿蘇介紹的好像要兩磅以上, 以差不多$150來講, 美心的天使蛋糕算是不錯的選擇, 大家不妨一試.

大匯演

2008-12-08T00:06:00.002+08:00

點解香港回歸後愈來愈老套, 但凡甚麼奧運金牌運動員, 太空人到訪都要舉辦大匯演, 其實佢地去體育館作表演示範或到科學館演講都已經好足夠, 佢地又唔係唱歌好叻, 大匯演都只係請d明星去表演下, 真係唔明次次都要咁搞.

返消防?

2008-12-06T01:10:00.004+08:00

因為要在年底前清假的關係, 我要在十二月內放七天假, 但因為有太多野做, 而且又有其他同事要放, 唯有返下放下咁, 剛剛便放了兩天假, 今天返一日工, 跟住又放兩天, 再下個禮拜又放埋餘下的三天, 有同事就話我好似返消防咁, 返一日放兩日!

微妙的關係

2008-12-01T01:09:00.005+08:00

唔知係唔係香港太細定係我識呢識去都係個班人, 你有冇試過你識的朋友原來一早已同你有微妙的關係呢? 我就有以下的經歷:

話說早幾年因工作的關係認識了其他bank的朋友, 她結婚發帖的時候發現她和她老公都各有一位住在薄扶林的朋友, 而且都是姓趙的! 後來她向我查証下, 原來她老公是我哥哥的大學同學, 而且她那時都已認識我哥哥的, 結果我們兄妹倆一起去婚宴, 我還記得最後送客時, 新郎哥仲笑對我阿哥話交翻個妹比佢呢!

另一個便是幾年前, 有一位同事由其他部門轉到我的team, 大家講下講下, 佢話我個樣有d熟, 後來才發現原來她是我哥哥(又係佢!)的舊同事, 佢仲話我地兩個幾似樣添, 真係激死我 (雖然我唔否認我地有點點似樣, 但係不之如幾似掛)

而今晚我出席一個婚宴後, 從一張即場派發的相片中, confirm了一位我不認識的舊同事(係唔係好複雜呢, 因為我地未曾共事過, 不過大家的舊同事是認識的) 是ddd 的舊hallmate, 天呀, 點解我的朋友圈咁錯綜複雜架!

翻版張國榮

2008-11-24T00:22:00.003+08:00

大家有冇睇無線台慶? 我冇睇哂, 但係咁啱睇到李思捷, 王祖藍同阮兆祥既扮嘢環節, 真係十分搞笑, 但係你又知唔知佢地都係唱得之人呢? 先講阮兆祥, 我好細個時已經覺得佢唱歌好好聽, 個陣時彭玲未紅時都有幫佢唱和音. 而王祖藍, 大家當晚都應該聽到佢唱男高音幾厲害, 冇記錯的話, 佢係演藝讀書時有學過聲樂, 所以都唱得好好.

最後係李思捷, 原來佢把聲勁似張國榮, 有次佢去港台Albert Au的2000靚歌再重聚, 聽下聽下真係以為張國榮係度唱緊咁, 大家不妨去聽聽個archive似唔似? (最多張國榮歌曲係節目既下半部份)

http://www.rthk.org.hk/rthk/radio2/reunion/20080504.html

X-Files 之飲茶篇

2008-11-19T00:16:00.003+08:00

上星期日約了舊同事飲茶, 然後再去housewarming兼探龍鳳bb. 於是便相約契女一家一起去 (契女阿媽係舊同事), 去到茶樓後, 契女阿媽便打電話給book枱的龍鳳b阿媽, 佢地搭緊車出黎, 佢話book左黃太十二位, 咁我地就去攞位. 本來個知客姐姐話要等, 我地話book左喎, 咁佢就比左張枱我地.

很快地我們便坐低, 開始點食物及洗杯碟, 等等下點解龍鳳b阿媽仲未到既? 明明話出緊黎, 咁耐都未到, 而且另外一位"新界王子"都未到, 佢平時都好準時喎, 於是再打電話比佢地, 點知原來個朝早改左地點, 但係又驚我地未瞓醒, 便send sms通知我地, 但係咁啱我地兩個都未收到個message, 而佢地就係新地點坐低左添! 與此同時, 我地點既點心亦已經黎到!

最後, 好彩另外個邊未點食物, 又唔洗比茶錢就可以走, 結果都可以好開心咁飲茶.

搞笑MV

2008-11-02T22:41:00.005+08:00

認識曉格蘭特 (Hugh Grant)這個名字是從"四個婚禮一個葬禮" (Four Weddings and a Funeral) 這套電影開始的, 他擅長於演出愛情小品, 可能你會覺得套套都差唔多, 但係輕鬆得來會令人會心微笑.

最近便租了他的"冧歌有情人" (Music and Lyrics) 回來看, 故事講他曾是八十年代的紅樂隊歌手, 之後當然漸漸地被遺忘, 直至後來等到一個咸魚翻生的機會. 電影裡一開始便有一首呢隊樂隊的MV, 叫"PoP! Goes My Heart", 首MV攪笑非常, 除了做型, 歌曲跟足八十年代的歌外, 連MV的拍攝手法和故事都好似回到八十年代一樣. 而首歌真的是Hugh Grant自己唱的, 都唱得唔錯, 我都用咗黎做電話鈴聲!

http://hk.youtube.com/watch?v=S0A7dtdc-nU

你有需要嗎?

2008-10-25T01:54:00.004+08:00

相信大家係呢個咁動盪的時候, 除左因為之前買左既股票大幅被蒸發而傷心外, 另外一個誘因可能係收到張稅單!

由於去年公司業績太好, 令我收到我咁大個女做野以來最多的花紅, 簡直有d做 i-bank feel! 所以今次呢張稅單的數字有點嚇人, 當中極大部份係預繳稅, 仲係以舊年咁好市既人工連花紅計, 如果我今年賺到都冇咩所謂 (話哂我以前讀書時都受過政府資助, 讀F.4 - 7都唔洗交學費, 連報會考, A-Level都唔洗比錢, 所以我都覺得應該交稅去幫d有需要的人), 但係今年咁既市況, 唔好話花紅, 連有冇人工加都成大問題, 年頭交稅時又接近農曆新年, 初時都有d閉"魏", 真係有"年關"的感覺.

但係下面呢張form就幫到我, 大約一個星期就收到稅局通知, 結果減了預繳稅, 如你有需要, 可以去下面條link睇睇, 希望幫到你啦!

http://www.gov.hk/tc/residents/taxes/taxfiling/object/provisional.htm

唔怕生壞命, 最怕改壞名 (二)

2008-10-23T00:26:00.005+08:00

上回講到改壞名, 今次就想講下生壞命.

大家可記得當年董建華做特首的日子嗎? 甚麼亞洲金融風暴, 八萬五, 負資產, 沙士呀, 香港在那幾年間經歷了很多危機. 但當董建華下台, 香港又重見好日子. 有點像董伯伯出任家族生意的倒影, 當他離開家族生意從政後, 公司股票上升了不少呢!

而政府那幾年累積下來的財赤, 亦隨著好命的唐英年出任財政司司長期間提早取得收支平衡. 可能在他的"好命"影響下, 香港的經濟亦回復興旺. 到現在唐唐再唔係財政司司長, 香港又再風波重重, 先有迷債事件, 繼而不斷有商戶倒閉, 裁員等壞消息, 香港經濟又遇上一次考驗. 所以都唔好話唔怕生壞命!

唔怕生壞命, 最怕改壞名 (一)

2008-10-21T00:18:00.004+08:00

俗語有云"唔怕生壞命, 最怕改壞名", 名字對中國人來講是相當重要的. 最近就在街上見到一個非常經典的例子.

每年到了九月十月的時份, 都是食大閘蟹的好時候, 今年適逢金融海嘯沖擊, 大部份市民都應該唔想聽到甚至自己都變左做大閘蟹. 點知屋企附近一間舖頭仲叫自己做"永恒大閘蟹", 做大閘蟹已經慘, 重要永恒, 真係唔知有冇人幫襯佢呢?

你過主啦, 唔該!

2008-10-12T00:45:00.004+08:00

究竟邊個要過主? 咪就係好討厭o既"四腳蛇".

呀"四腳蛇"先生/小姐, 我同你唔係咁熟咋喎, 你唔好成日黎探我啦, 我屋企都冇咩可以招呼你, 你最好就快d過主啦, 費事大家見到面會"面左左"啦!

春秋二祭

2008-10-07T23:11:00.005+08:00

今天是重陽節, 根據習俗是要登高的, 後來就演變成去拜山, 過往我屋企並沒有重陽去拜山的習慣, 每年只會在清明節才去拜山的, 但ddd一家則十分慎終追遠, 每年都會進行春秋二祭, 今天亦不例外, 而目的地則是元朗的一條村子裡.

由於小妹未嫁前都只係到將軍澳的華人永遠墳塲掃墓, 地方都會保持一定的清潔同整齊, 但今天要去掃墓的地方則是在山頭上, 四周都被樹木, 草地包圍, 雖然今次並不是第一次跟ddd去拜山, 但可能前兩天都下大雨, 今次就見到很多小動物及昆蟲, 包括白紋伊蚊(佢地好似完全唔驚蚊貼), 小蜘蛛, 螞蟻, 不知明的蟲, 草蜢, 黃蜂, 小四腳蛇, 同一隻金黃色的小青蛙!

其中有一處係我今次第一次去的, 要經過一些高至腰間的草地才去到, 可能那處並不是每次都去拜祭, 點知那處已被野草所覆蓋, 要動員幾名男丁去將野草, 野芋除去, 原來那些野草長得好像一塊麻包袋般, 可以整塊捲起來(當然要費很大的力氣)

上面左面那幅相係走的時候發現有隻草蜢走到我們的車頭上, 點知食完lunch見到有一隻走到車箱裡(我驚佢會跳到我身上, 所以冇影到, 最後我叫ddd將牠撥走, 點知佢跳到ddd的面上), 而另一隻則走到車窗外, 跟著車子到汀九橋時才被強風吹走!

中環的一盅一件

2008-10-04T23:27:00.004+08:00

唔知大家小時候有冇去d舊式茶樓飲茶呢? 我就冇, 我細個o個陣去飲茶都係去d有地毯的酒樓. 昨天大家見d老闆都去哂 golf day, 於是就去左老字號蓮香樓飲茶, 同事知我怕污糟, 就特登搵d邊邊既位, 雖然佢地已經早少少去搵位, 但係唔知點解個日咁多人, 結果等左大半個鐘先有位坐下. (因為太舊式, 冇得book位或者輪籌, 要mark實一張枱企係隔離等d人走)

雖然幾年前都試過同d同學去蓮香樓食晚飯, 但係飲茶同要晚飯係兩回事, 晚飯可以book位, 而且地方都好整齊同乾淨, 但飲茶就熱鬧非常, 你可以見到地上有骨頭, 而呢d舊式茶樓要自已去搶點心, 冇錯, 係搶, 一d受歡迎既點心如馬拉糕, 如果你唔去搶, 好快就會冇哂. 而呢度另外一個特式係一人一盅茶, 如果你怕熱既話就要小心被熱水燙傷啊!

我o地一行五人, 都搶o左唔小點心, 有豬肚燒賣, 豬膶燒賣, 叉燒包, 蓮蓉包, 魚翅餃, 梅子排骨, 山竹牛肉, 叉燒腸粉, 鯪魚球, 鵪鶉蛋燒賣, 馬蹄糕, 食o左咁多野你估下埋單幾多錢? 只係$222, 即係每人$44.4 咋, 真係抵!

公益便服日

2008-09-30T00:52:00.006+08:00

今天又到公益便服日, 我未join現在呢間銀行前的那間本地銀行並没有參加公益便服日, 一到呢日就好羨慕其他人可以著便服返工, 所以我一直都好恨可以參加便服日, 直至我 join左呢間bank, 先可以參加, 所以我就將咁多年呢參加過的 sticker儲底留念.

不過呢間bank都幾出錢出力, 每年都會攪番個服飾大賽, 鼓勵各dept參加. 今年當然都唔例外, 我地就"行行地"咁決定用彩虹做主題, 穿上七種顏色的衫, 加上用氣球做的彩虹做道具. 但係睇番其他dept仲厲害, 有時光倒流著校服的, 有rap look的, 有唐裝的, 有halloween look的, 真係各出奇謀.

家好月圓大結局 --> 荷媽餅家結束營業?

2008-09-28T01:06:00.003+08:00

近期無線的家好月圓掀起一陣追看潮, 大結局當晚, 餐廳很多七時的枱都full booking. 大約八時左右, 客人都紛紛埋單回家收看大結局, 真的有點哄動.

有追看的人都可能知道荷媽所開的荷媽鉼家是在北角道的奇華餅家取景拍攝的, 今天剛好經過, 卻見到那家奇華已經隨著大結局而結業 (應該是搬了, 但不知道搬去哪裡), 不知是誰先誰後呢?

消息滿天飛

2008-09-25T00:34:00.002+08:00

今天本港的大新聞相信除了颱風帶來的各種破壞外, 便是東亞被傳唔掂的消息了, 其實我聽到呢個消息時都覺得不太可能, 因為早上報紙才報導寶baby要增持股份, 而且那些 investment bank的不利消息暫時對本地銀行都沒有太大影響, 誰知真的有大批市民湧到銀行提款, 雖則話東亞歡迎市民提款, 但現在銀行都在吸存款, 一下子被提走那麼多錢, 其實都幾傷!

在呢個咁動盪的時候, 一個謠言隨時可以做成很大的破壞!

金融海嘯 Financial Tsunami

2008-09-17T00:47:00.003+08:00

早前的次按風暴, 令人開始擔心美國的經濟, 雖然不斷有不同的措施推出救市, 但情況都不太明朗. 呢期我忙於做明年的budget, 老闆們已經對前景不太樂觀, 轉攻為守, 大前提係要做好d credit. 誰不知昨天聽到Lehman Brothers要申請破產保護的消息, 真的有點驚訝, 今天一如意料股市大跌. 你或許會從很多報章, 新聞等提到一個term, 叫"金融海嘯" (Financial Tsunami), 上網查一查, 原來係有"債券大王"之稱的Bill Gross講的, 想知佢講咩? Click下面條link睇睇:

http://www.bloomberg.com/apps/news?pid=20601087&sid=aZLLPW9YEa60&refer=home

叫得做海嘯, 就即係唔會係個別個案, 而係一浪接一浪, 且看另一間有危機的AIG可唔可以逃過一劫.

雖然小妹公司以穩陣見稱, 但係出年的bonus真係凍過水! : (

有性格的蛋卷舖

2008-09-15T11:41:00.008+08:00

唔知你有冇睇過蘇施黃在有線主持的一粒鐘真人蘇呢? 其中她有介紹過的一間位於北角渣華道的蛋卷舖, 呢間蛋卷舖已經在北角開了多年, 佢地都真係幾有性格, 咁大間舖只係得三種產品, 分別係

牛油味蛋卷
鷄蛋味蛋卷
椰汁味蛋卷

當然每種蛋卷都分大罐同細罐裝, 但係佢地只係靠呢三種口味就已經生存到. 而且有時去買的時候, 你會見到有d貨已經比人預訂左, 所以遲d去都可能已經賣完. 另外佢地仲係逢星期日休息, 都真係幾巴閉.

另外, 如果你想買翻幾罐新年送禮, 咁真係要請早啦, 因為要係中秋節過後去訂貨 (中秋前佢地都唔受理, 話要八月十六先接受預訂), 佢地新年前只係會賣貨比d預訂左既人, 咁冇預訂既點算? 聽講佢地年廿七, 年廿八咁上下會有散貨賣, 不過好似一早就要去排定隊. 你話佢地係唔係最寸既蛋卷舖呢?

黑仔組

2008-09-13T23:19:00.002+08:00

話說今年受到拉妮娜的影響, 颱風比較多, 剛巧八月放大假時便遇到北冕吹襲香港, 令我白白浪費了一天大假, 要待在家裡.

誰不知緊接我放假的另一位同事, 在她要由布吉返港的那一天, 就遇上鸚鵡襲港, 結果她滯留在布吉, 要臨時在機場附近找酒店住一晚, 第二天還要等到淩晨才到港. 不過可幸的是她只滯留一天, 如果她遲一點才出發, 可能便遇上泰國反沙馬的示威騷亂, 機場要封閉數天!

不過我們兩個都未數最黑仔, 因為我們的組長, 她趁著中秋節幾天假期(剛巧是她生日)去台灣玩玩, 怎知今次則遇上森垃克吹襲台灣, 今天聽新聞知道下午開始便停飛台灣, 但她的航班是在今天一清早, 即係話她應該已經到了台灣, 但今天台灣已宣佈停工停課, 睇黎佢都只有在酒店過呢個假期兼生日了, 而且這個颱風移動非常緩慢, 所以可能會影響她回港的行程呢, 她可算是我們之中最黑仔的一位了! 我唯有係度祝佢平安回港&生日快樂!

好奇怪的選舉結果

2008-09-09T00:01:00.002+08:00

相信大家都可能對昨天的選舉結果有點出乎意料之外, 首先係自由黨竟然一個直選席位都冇, 我覺得應該係佢地策略有錯, 以佢地商人背景既政黨, 應該派一個有份量的人出選港鳥區呢個以中產人士較多的區, 而唔好出埋d知名度不足的人出選.

另外就係長毛, 真係有d唔明以佢呢四年的"政職", 點解d選民會支持佢連任呢? 莫非係想睇下佢同葉劉係議會的罵戰?

就連功能組別的結果都有點出奇, 點解律師謝偉俊又會係旅遊業勝出呢? 今界的立法會選舉結果真的令人莫名其妙, 真的想知香港呢四年會點啊!

自訂車牌

2008-09-04T23:46:00.002+08:00

自從政府推出自訂車牌以來, 不時都可以在街上見到一些有趣的車牌, 如一架 Aston Martin 便掛上 "Martin"的車牌, 唔知係因為車主本人叫 Martin 定係因為架車叫 Martin.

今朝返工的時候, 見到一部的士竟然都掛上一個自訂的車牌, 你估下個車牌是甚麼? 答案係 "TAXI"! 呢位車主真係又有錢, 又有心思啊!

Baby boom?

2008-08-31T02:06:00.002+08:00

之前幾年成日都聽到出生下降而引致的種種社會問題如入學率不足, 人口老化等新聞. 但我想呢兩年的出生率是否有上升的趨勢呢? 因為身邊的朋友及同事呢兩年都紛紛有喜, 今年更誇張, 認識的同事中有已四位今年做了或將做爸爸媽媽, 而朋友都有四位, 其中一位更是龍鳳胎呢! 而我亦將會忙於編織一些小禮物給這些bb啊!

豬牛羊格價消息?

2008-08-28T00:41:00.002+08:00

呢半年來百物騰貴, 在我家附近的辦館本來都很價廉物美, 但係最近都加了不少價, 如一條廁紙, 由年初的$22, 加到$28, 成27%升幅. 今晚從新聞報導得知消委會做了一個價格調查, 發現同一區內同一貨品有很大的價格差別, 仲話會做一個貨品格價的網頁, 方便市民查閱, 不敢令我想記"大鬧廣昌隆"裡, 以前的收音機會有豬牛羊格價消息這類的節目, 估唔到現在呢個現代化的社會都需要有同類的消息!

測~試

2008-08-14T00:49:00.003+08:00

你好嗎?
你好嗎?

你好嗎?

睇奧運睇無線

2008-08-10T23:54:00.005+08:00

雖然呢句係宣傳口號, 但係睇完無線同亞視由開幕以來頭兩日轉播來看, 無線都係高一班. 其中亞視最失敗的係d主持, 好似開幕時谷德昭,林曉峰等, 防死有冷場咁, 成日係度講廢話, 好鬼煩. 跟著再睇番無視既重播, 好好多.

另外亞視請來的評述員都冇無線咁專業, 無線真係會請一d個項比賽既教練如跳水的梁伯韜, 排球的雷sir, 或者係曾經參加過比賽的過氣運動員如洪菘蔭, 李啓鑒咁, d評述pro好多. 就算係唔關事的阿叻, 雖然有時都有d廢, 但係都唔太會令人討厭.

最後, 最重要係我屋企淨係收到亞視高清的11台, 但係無線就收到81,82,84,85台, 所以我都會睇奧運睇無線.

李寧 vs 劉以達

2008-08-09T03:02:00.003+08:00

剛剛睇完北京奧運的開幕, 比想像中還要出色及吸引 (其實沒甚麼期望, 只要不太"娘"便是了), 全場都以一副捲軸晝為中心, 並以中國的四大發明為表現項目, 其中我最喜歡的便是用烟花做出29個腳印到鳥巢.

不過最後以李寧做火炬手, 飛上半空, 凌空做出跑姿, 再燃點火盤呢個 idea 都唔錯, 但係可惜鏡頭沒有正面映到李寧, 見佢又好似冇表情咁, 從側面看覺得佢好似大內密探零零柒中的劉以達飄到周星馳面前叫一聲大夫, 有點好笑.

以整體而言, 呢個開幕典禮的水準的確很高, 亦很有張藝謀的味道, 我相信外國人一定很喜歡看, 古典得來唔會老土, 又富中國特式. 不過用高清睇真係好靚, 而無線的畫面比亞視還要細緻, 加上d主持冇咁多廢話, 非常好!

五星級酒店果然係唔同d

2008-08-05T01:10:00.009+08:00

話說今次峇里的婚宴是在Ritz Carlton舉行, 嘩, 真係不得了, 可以免費去住五星級酒店 (因為主人家已訂了我們的房間), 仲係resort添, 我咁大個女都係第一次住resort, 雖然只會住兩晚 (跟住會轉移鎮地), 真係諗起都開心 (有點像要去參加梁朝偉劉嘉玲婚宴一樣的心情).
一落飛機就找的士去酒店 (後來才知道原來主人家有叫人去機場接我們啊!), 大概二十分鐘便到, 不過由見到酒店入口到到達大堂門口都有一段頗長的車程, 可想而知呢間酒店都幾大喎!

可能幾年前曾發生過爆炸事件, d酒店保安都有點嚴謹, 進入酒店前會先檢查一番車輛, 佢地會用鏡子照下車底有冇可疑物品, 又check下d行李咁, 重會係d行李貼上"checked by security"的字樣.
五星級真係五星級, 一落車就有人送上花環, 等check-in時又送上一杯清涼可口的果汁, 雖然d人手腳慢d, 但係都ok啦. 至於房間麻, 間真係正呀(除了有點兒舊), 不但大,仲有個露台, 因為我們的房間在地面那層, 所以可以從露台走出去對開的山坡, 還可以從那裏走到隔離的房間呢! 我們兩晚都有到那個露台看星星呢!（因為峇里不像香港那麼多空氣污染及光害, 所以晩上可以看到很多很多的星星)

又到放榜

2008-08-05T00:03:00.005+08:00

今天又係會考放榜的日子, 回想當年自己放榜, 都算係幾好彩, 成績不錯, 原校升中六, 但係當年竟然想也沒想過要去找別的學校 (當時並沒有甚麼收生程序, 大家都要盡快找學校), 跟同學報了原校, 便出外食飯飲野 (因為要下午才知道是否取錄), 真想像不到如果當年學校唔收番我會點算!

不過話說回來, 其實考試成績雖然係重要, 但係唔代表一齊. 當然成績好條路好行好多, 但係唔等如一帆風順. 前幾日從雜誌見到採訪一位拔萃校友, 講述他如何由一位從大陸來港, 膽粗粗自己走去拔萃求校長收佢做學生, 在中學時代多方面的發展, 繼而得到奬學金到美國留學, 最後被高盛取錄, 其中我最認同佢的一句話, "華爾街大行需要的, 不是修讀過財金的大學生, 而是一張醒目的白紙. 你只要聰明, 醒目, 易教, 在投資學問上即使是白紙一張也不是問題".

真是的, 工作這麼多年來, 我最憎的便是那些"高分低能", 這些考試成績好但自以為是, 認精學懶的人, 大都只懂得吹水, 吹得太大又要找人幫佢補鑊, 一d都唔踏實. 所以即使唔聰明都唔緊要, 但係一定要將勤補拙, 都會有成功的一日.

出門靠阿哥

2008-08-03T18:21:00.006+08:00

俗語有話出門靠朋友, 但係我出門要先靠阿哥, 點解? 因為好多旅行裝備都是問阿哥借來的.

先是旅行喼, 一大一小任我揀, 因為這次需要帶比較多的衣物及其他用品(要去出席婚宴麻), 所以我兩個都先拿回家作預備, 最後都只是用了一個大喼去pack兩人的衣物用品. (P.S. 其實我覺得自己pack野的技巧都幾好架, 以前都成日幫阿哥pack野返大陸公幹!)

因為今次係去充滿陽光海灘的峇里, 梗係要準備防曬用品啦, 呢方面都係要靠阿哥, 因為佢都算係男人之中幾鍾意買野的, 我一話要借防曬, 佢就即係攞出各式各樣的用品出來比我揀, 包括sun block, after sun gel (仲分塗身及塗面的), 連眼部防曬, 防曬唇膏, all-in-one shampoo & shower gel都有, 又有防水袋用來袋濕了的衣物, 沙灘袋等, 最後我只係借了相中的那些.

另外臨出發前, 因為佢想幫阿媽換個副眼鏡, 我當然都跟住去啦, 因為我個副都戴咗三年啦, 都想驗一驗, 就係咁我就換了一副可以加太陽鏡片的新眼鏡去旅行, 哈哈, 仲係有大食大, 由阿哥比錢啦!!! Yeah!

同幼稚園同學去旅行?

2008-08-02T17:46:00.006+08:00

現今的小朋友真係好幸福, 放暑假竟然可以同幼稚園同學一齊去旅行, 而且仲係搭飛機個種旅行添, 唔信? 有相為證.
相中戴著口罩的小女孩是ddd那位醫生表哥的女兒恩恩(唔知係唔係呢個恩字), 今年將要升K3, 而那位穿橙色衫的女孩便是恩恩的同學Nicole, 兩個家庭相約到峇里旅行, 順道參加婚宴, 真係勁呀!

向峇里出發

2008-08-01T17:11:00.012+08:00

話說ddd的表哥是印尼華僑, 他邀請我們一家到峇里出席他的婚宴, 更替我們訂了酒店, 因而造就是次峇里遊.

但這次的旅行有點兒波節重重, 先是出發前ddd又是膝蓋痛, 繼而牙痛, 發燒, 最後面上出了紅點子, 兩個星期內看了多次醫生, 臨行前以為吃了抗敏藥會好一點, 誰不知一早起身時, 有人在廁所叫了一聲, 原來那些紅點已經蔓延到全身, 真的不知道究竟是敏感還是出疹子, 真有點擔心他能不能過海關.

結果我們還是出發到機場, 但見他的紅點還沒有好, 雙手還腫了起來, 於是便再吃一顆抗敏藥, 還替他塗點藥膏, 好在最終都能順利過關, 臨上機前還來得及打電話問之前看膝蓋的姑娘他吃的是甚麼藥, 因他懷疑是那些藥令他的皮膚出紅點的.

同行的還有他的一位醫生表哥, 他都認為那些紅點只是敏感, 吃過藥後好像又真的好了一點, 起碼頸上的紅點退了一點, 而雙臂的紅點更有點像窗外的雲呢!

疫區

2008-07-20T14:43:00.004+08:00

近日不知是否流感高峰期還是小妹公司實在太忙, 我team的同事大都病倒了(超過一半), 當中還有人患蛇啊! 在公司大裝修後, 我們的座位都變成豬肉枱, 而我team就佔了一整張長枱, 而我地就笑話我們的那張枱已變成疫區!

雖然大部份同事都病了, 幸好小妹力保不失(touch wood, 小妹平時都比較硬淨), 還很健康(起碼表面上係), 希望大家都早日康復啦!

小病是褔

2008-07-15T00:43:00.003+08:00

小病是褔這句話真是沒錯, 一場小病可以提醒你要多點休息, 或者及早知道自己的身體狀況, 以作預防.

上星期ddd的膝蓋忽然覺得很痛, 於是便去看骨科醫生 (好在我公司的醫療保障還真不錯, 只要是panel doctor, 不用甚麼介紹信便可以去看專科, 仲可以簽個名便走人), 經過一番查問, 檢查及照x-ray, 醫生話可能係連著波羅蓋的肌肉裂了, 給了他一些藥及藥膏, 還叫也要用柺杖, 不要用力. 我們還上了一課biology呢, 因為醫生好有心機的用紙畫出膝蓋部位的結構圖啊.

不過總的來說, ddd應該認認真真的減一減肥, 減輕膝蓋的壓力了!

真的老了

2008-06-29T02:29:00.003+08:00

可能有些朋友知道我幾歲時已經做了別人的表姑姐, 表姨, 因為我的表哥表姐們都大我十幾廿年, 而他們大多比較早婚及生仔, 所以年紀輕輕的我便升級做姑姐, 姨姨咁. 我小時候還會攞他們的玩具玩呢!

最近我大表姐帶著她的女兒由加大拿回來放暑假, 她的女兒還有一年便大學畢業, 其實除了之前講的那位養貓的表侄在讀小學外 (因為那位表哥差不多四十歲才結婚), 大表姐的女兒已經是那批表侄表姨甥中最小的一位. 而在今晚的親戚聚會中得知, 我大表哥的兒子出年便結婚了! 難道真的不能不認老了?

我是一隻貓?

2008-06-29T02:08:00.004+08:00

我表哥的女兒養了兩隻貓, 新年的時候問她兩隻貓叫甚麼名字, 她唔肯講. 我還問是否一隻叫 Hello, 另一隻叫 Kitty, 咁夾埋就係 Hello Kitty.

今天我從大表姐口中得知原來一隻係男仔, 叫做大雄, 另一隻是女仔, 叫二小姐. 其實我的同事都叫我做二小姐的, 點解? 都是平日閒談時想出來的花名. 忽然間令我變成了一隻貓添, 真係有點擔心他日到表哥家裡, 當他的女兒叫貓貓時會唔小心咁應佢啊!

花樣少年

2008-06-17T13:45:00.002+08:00

話說我公司每逢暑假, 總會請來一班 summer intern, 今年我的部門就來了一位 summer intern, 由於他是幫隔離team的, 所以沒有特別介紹, 我們暗地裡叫他做"花樣少年". 點解叫"花樣少年"? 因為我d同事話佢o既外型很像台灣的那些偶像, 頭髮少少長, 白白淨淨, 瘦瘦削削的那種.

這位"花樣少年"是我所見過的summer intern中的比較"頹"的一位. 先講衣著, 雖然唔係牛記笠記, 但一點也不像上班look, 他試過著中袖裇衫返工, 除了女裝裇衫外, 我現在才知道男裝都有中袖的. 另外他穿的襪子是運動型的, 即襪頭只到腳踝那種. 他的頭髮雖則不是太長, 不過我想我Team Head (女Team Head) 的頭髮比那位"花樣少年"還要短呢.

而工作態度呢, 我真的不太知道, 不過我經過時, 總有機會見到他在玩 iphone. 我聽同事講, 他是在Poly 讀緊account, 不過他就寧願在銀行做暑期工都唔去audit firm 做, 因為佢唔鍾意account喎, 而那位同事覺得這位"花樣少年"應該是那些"御宅族", 即電車男, 一個二十出頭的大男孩, 一點陽光氣息也沒有, 既不主動和人溝通, 做事又不積極, 雖則唔應該以貌取人, 但如給我請人的話, 我不會請這類"花樣少年"的. 真的不知道為何台灣的這種花樣少年偶像會紅起來.

的士阿伯

2008-06-15T00:58:00.003+08:00

今晚冇揸車返娘家, 走o個時因為驚會落大雨, 所以便搭的士回家. 一落樓就有一架的士落緊客, 我們就跳上這架的士, 跟住我們暗叫不妙同好後悔上呢架的士.

點解? 因為個司機係一位年若七十歲的阿伯, 事先聲明, 我們絕對唔係年齡歧視, 而係呢位阿伯實在太古怪. 事件一, 可能屋苑內比較多"膊"及對頭的士, 初頭佢開車o既速度實在太慢, 可能只得10-20咪, 有點驚唔知幾耐先返到北角. 事件二, ddd見佢個錶板冇著燈, 就問伯伯係唔係冇開燈, 點知伯伯話佢係替更, 跟住仲喃喃自語話做替更連毛巾都冇, 又咿咿哦哦唔知講咩. 事件三, 當個的士call台係度講交通消息時, 又喃喃自語講呢條就要$40 (我估指西隧), o個條就$25 (應該指東隧).

結果成程車伯伯無論係見到騎警, 聽到call台交通消息, 見到紅隧塞車, 佢都咿咿哦哦, 仲時不時提起冇毛巾呢樣野, 連平時搭的士唔會戴安全帶o既ddd (大家千祈唔好學), 都驚o左呢位伯伯而戴番! 最後都有驚冇險咁返到屋企!

捉鬼男 (Reaper)

2008-06-13T00:44:00.003+08:00

之前已聽ddd講明珠台有一套劇集叫"捉鬼男(Reaper)", 好像很有趣. 誰不知在上星期六的一個商台節目中 (我可是商台的忠實聽眾啊!) 聽到主持人泰山 (即那位大大舊, 和蘇施黃一起做有線的一粒鐘真人蘇)介紹這個劇集, 令我更想看看, 剛巧今天晚上做 (最緊要係記得睇), 於是便收看了.

"捉鬼男"是講述主角Sam的父母在他小時候為了要換取他病重爸爸的健康, 就將他的靈魂賣給了魔鬼, 而魔鬼就在Sam 21歲的時候出現, 要Sam為"他"捉回從地獄逃走的惡魔, 今集是講Sam從抗拒這個任務到糊里糊塗地捉了第一隻惡魔, 過程十分攪笑, 加上佢有二位好攪笑的好朋友, 令到套劇集好好笑, 如你有興趣的話, 不妨一看, 這套劇是逢星期四晚 9:30 做的, 小心笑爆嘴啊!

黑色暴雨過後

2008-06-08T22:59:00.006+08:00

昨天的大暴雨差不多令香港癱瘓了, 看過新聞片後更覺恐怖, 在往機場的路上, 本以為有一架七人車淹至只露出車頂, 誰不知當水退了些後, 厡來還有兩部的士更被淹沒!

今天我就到了另一個水浸地點 --西環及薄扶林, 亦即是我娘家. 其實昨天已經聽我哥哥講真係好大雨, 可能剛好有些地方在挖路, d雨水加上泥, 攪到滿地泥濘, 而一些路亦被雨水沖毀. 當雨勢稍弱時, 他和我媽媽落街買野 (今日要做節麻), 他們見到一個人在平台滑倒, 轉了360度後倒了下來, 雙唇貼在地上動也不動, 嚇得我阿媽叫救命! (後來他們問管理員, 那個人好像沒有什麼大問題了) 後來他們又見到一架的士停在路中, 起初我哥以為可能是撞了車, 但的士前又沒有其他車, 原來是因為大雨關係, 一些水務署工人打開了水渠蓋去水, 那輛可憐o既的士不知道, 前輪跌落了渠口!

今天回家做節, 差不多到的時候, 感覺自己好像去了大陸一樣, 路上滿是泥土, 車輛經過時更是沙塵滾滾, 經過HKU時, 更見到還在退水, 黃泥水從黃克兢樓流出來, 真的不知道何時才可以將那些泥清理掉!

蜘蛛俠

2008-06-07T02:27:00.004+08:00

昨天聽新聞, 那位真人版蜘蛛俠又出動了, 其實上次他來香港爬Four Seasons 時, 我在office用手機影了幾張相.

見唔見到有一點紅點? 那就是蜘蛛俠的褲子. 而消防車等亦已到場戒備.

去迪士尼-----------開會!

2008-06-07T02:24:00.002+08:00

你冇睇錯而我又冇打錯, 遲些我要去迪士尼開會呀!!!

近年一些企業喜歡開off-site meeting, 希望大家可以在遠離公司環境下會冇咁拘束, 大家可以融洽d, 輕鬆d. 而小妹公司的高層亦好buy呢個idea, 所以在一兩年前已經舉辦此類meeting.

而今年的meeting更由以往的一年一次變為一年兩次, 今次就會在迪士尼酒店開, 雖然去迪士尼心理上應是開心d, 但試想想星期六一早九點鐘就要去到大嶼山, 預期要開到五點鐘, 完會後入場玩又太夜, 唯有睇下開完會可以去邊度玩下啦!

六四

2008-06-04T13:45:00.006+08:00

又到六四了, 不知不覺已十九年了, 連在六四事件後剛出生的都已成年了. 今年遇上四川大地震, 天災vs人禍, 作了以下的比較:

當年在天安門痛失孩兒的父母 vs 今天在地震中痛失小孩的父母

當年的消息封鎖 vs 今天的消息開放 (前兩天聽新聞說中央把籌得的款項詳情上載網上)

當年領導人的態度 vs 今天領導人的探訪和慰問

當年香港人的支持 (颱風下仍上街遊行) vs 今天香港人的支持

中環的天橋網

2008-05-31T14:45:00.005+08:00

這兩天很大雨, 整個天都是黑黑的. 我不喜歡下雨天時出街, 我怕髒, 尤其怕那些陣年灰塵被雨水沖洗走的污水. 慶幸這兩天我都是回到公司才下雨, 不用被雨淋.

不知大家知唔知中上環的天橋網四通八達呢? 等我呢個係中環打滾左幾年o既人為各位介紹一下.由上環的信德中心做起點, 源天橋向東行你可以走到

維德廣場 (那裡有間潮江春, Suzuhi Cafe)
海港政府大樓 (可到那兒拿特區護照)
恆生銀行總行 (正是小妹工作的地方)
半山Soho區, 堅道, 羅便臣道至干徳道 (經恆生銀行的天橋向上山方向, 沿中區行人天橋直上, 就可以到很多地方, 實在太多了, 不能盡錄)
IFC (太出名了, 不多作介紹)
Four Seasons (你可能會在這兒撞到徐子淇和她的千金呢)
往離島碼頭 (可經由IFC City Super 旁的天橋前往)
Exchange Square (除了大陪份人都很留意的交易所外, 這裡還有不少餐廳如洞庭樓,翠玉軒, Triple O, 札幌拉麵等)
怡和大廈, 即以前的康樂大廈 (那裡地庫都有幾間餐廳, 潮江春, 怡翠軒, Grappa's)
中環郵政總局 (你可以經過郵局到大會堂)
新的天星碼頭
環球大廈 (我覺得這個地方差不多已被菲傭佔據)
Charter House (好似話係Giorgio Armani最大的旗艦品)
歷山大廈 (有北京樓, Cova)
太子大廈 (商場裡有很多有趣的店舖, 有一間專間賣小朋友開party玩意的, 亦有一些銀器舖, 珠寶名店如Cartier, Van Cleef Arpels, Piaget等, 食方面有Oliver's 的supermarket, 難吃的Canteen (這間真的比較差), Cova (這間只有外賣))
Mandarin Oriental (經太子大廈, 你可到二樓看看這裡的cake shop, 如你喜歡食cheese cake的話不妨試試, 我覺得好像將一舊芝士放在餅皮上, 實在太cheese了, 不過這裡還會擺放一些用蛋糕做的擺設, 我上次就見過用蛋糕做的名牌手袋, 很有趣)
Landmark (有很多名店或連鎖店, 當然你可以到常在娛樂版見報的Cafe Landmark嚐個下午茶, 看看會唔會見到四哥, 狄波拉等, 地庫亦有間貴地嘔的日本餐廳, 不過建議大家可以到3/F的Three Sixty逛逛, 這兒的麵包幾好美)
中建大廈 (有間幾大的HMV)
中匯大廈 (即馬莎隔離的那座)
娛樂行 (有皇廷匯)
東亞銀行總行 (你知唔知那裡的二樓有個小商場呢)
皇后大道中九號 (在我記憶中是早期的商廈只用門牌命名)
渣打銀行總行 (那兒的地庫都有一間皇上皇)

你睇下中環的天橋幾方便, 雖然可能會比在地面走得遠一點, 但下雨的時候(當然不是橫風橫雨), 我可以不用拿傘子便可到很多很多的地方了!

人細鬼大語錄

2008-05-29T23:41:00.005+08:00

時下的人很注重養營, 尤其對小朋友的飲食, 甚麼DHA呀, 胡蘿蔔素呀一大堆的, 而且資訊又咁發達, 所以d小朋友大都人細鬼大, 有時說話老氣橫抽, 以下便是一d好笑的語錄:

個案一
一天, 小朋友打電話到公司找媽媽, 想媽媽早點回家陪她, 但媽媽還有要事要做, 要開OT, 小朋友就帶點吩咐的口吻對媽媽話: "咁你做快d啦, 快d做完返屋企陪我啦"

個案二
話說家中的印傭快唔做要回印度, 一天媽媽跟孩子們在玩耍, 忽然兒子跟媽媽有以下的對話
兒子: 媽媽, 點解你唔去買餸呀? 遲d姐姐要走你唔識買喎!
媽媽: 咁我要同你玩牙麻!
兒子: 咁你可以去買左餸返黎, 交比姐姐煮, 先同我地玩麻, 你地要分工合作啊!

個案三
一位小朋友因唔想被大人抱, 跟那位大人講: "我好重架!"

個案四
又有一位小朋友唔想同d大人一齊玩佢d玩具, 於是同大人講: "呢d係細人玩架!" (哈哈, 佢可能以為"大人"的相反是"細人")

簡單布甸

2008-05-29T13:51:00.004+08:00

有日到city super逛逛, 見到有一盒Jell-O出的布甸粉是有Oreo的cookie & cream 味道, 便買來試試.

它的做法非常簡單, 只要加入兩杯凍牛奶, 攪大約兩分鐘, 再倒入小杯裡便可.

於是我們便買來兩盒高鈣低脂牛奶(要健康點麻), 將布甸粉倒入一個大bowl裡, 加入牛奶, 慢慢攪勻, 在攪下攪下的同時, 你會覺得它開始有點黏, 因為我們沒有啫喱杯, 所以就由得它在那個大bowl裡繼續凝固, 為了想加快這個過程, 將它放入雪櫃裡, 過一些時間看看, 見它都不是太"結", 想想應該ok便試食.

不知是否我唔喜歡飲奶, 總覺得奶味太多, 而ddd亦覺得只是一般, 下次還是做啫喱比較好些.

蘇杏旋

2008-05-29T13:29:00.003+08:00

唔知大家仲記唔記得蘇杏旋呢? 她以前是一位電視藝員, 我想我認識她是從她有份演出的新紮師兄開始.

之前我曾提及無線經典台會重播新紮師兄, 蘇杏旋在此劇是飾演梁朝偉的媽媽, 她是靠在車衣賺錢養大梁朝偉的, 昨晚有一幕她在家裡車衣的情景, ddd忽然話"佢好似你阿媽喎!", 哈哈, 真的, 因為我和我哥哥以前就已經覺得我阿媽有點像蘇杏旋, 在這套劇中, 無論工作(我媽媽以前都是在家裡車衣的), 衣著和某些表情(我覺得尤其是側面) 都很像. 所以現在翻看, 覺得很好笑, 有點似見到阿媽後生時的樣子! 有點想錄下來給她看看.

營養過剩?

2008-05-29T00:24:00.005+08:00

相中的小朋友是我的契侄兒, 他出世時已有九磅重, 現在才四歲但已經有七十磅, 以他這個年齡已是超重二十磅, 他的前臂比我的手臂還要粗呢! (當然他爸爸也是位有份量的人)

話說有一日去麥當勞, 他自己話冇胃口, 但那一餐他也吃了一個魚柳包, 兩塊麥樂鷄, 半杯雪糕, 一盒薯條, 冇胃口都已吃得比大人多, 真是驚人. 另外有次他爸媽為他健康著想, 唔准佢添飯 (咁細個人已經要添飯!), 佢仲話阿爸阿媽都唔錫佢喎.

前天晚上跟他吃完飯後, 在等車時嘗試抱起他, 嘩, 真是重得很厲害, 我只能將他抱離地面幾cm!

香港潮語學習字卡

2008-05-27T00:05:00.008+08:00

相信大家早陣子都可能收到朋友forward來的"香港潮語學習字卡", 當中有"潮語"相信大家都耳熟能詳, 我初時收到這個email後, 還以為只是網上流傳.

那天我上完cooking class後, 到了商務逛了一陣子, 竟給我發現原來真的有這個學習字卡在賣, 價值$75, 真的有點衝動買回來, 但想想可能那字卡已全部給scan了上網, 才放棄了.

不速之客

2008-05-25T12:32:00.005+08:00

不知是否我們家附近有幾棵大樹的關係, 近日總是有不速之客到訪---四腳蛇! 而我亦因而採取了相關的措施去打擊牠們, 分別有以下各項:

到city super買來一支專門防蚊蟲的噴霧, 將噴霧噴在窗框, 門框便可得防蟲的功效(主要是要令不速之客絶糧)
經同事介紹買了香薰爐和有驅蟲作用的香茅油, 其實香茅油的氣味正是驅蚊貼的氣味, 可想而知有點難聞, 所以我亦買了尤加利(對鼻敏感有幫助) 及薄荷(預防傷風感冒)來混和 (有次奶奶還以為我們塗了什麼藥油呢)
請鐘點加點香茅油在水裏才去抺窗和抺地

誰不知實施了以上措施後, 昨晩我回家後想去洗澡時, 竟然給我發現有一條四腳蛇在書枱上方的牆角, 因為ddd去了舊同事的婚宴, 只好打電話給他, 叫他盡量早點回來處理牠. 而我亦只好去洗澡等ddd回來兼避難. 結果一避就是一個小時, 害我洗好了都不敢出來, 要坐在浴缸邊看柯南漫畫! 終於都等到救星回來, 點知四腳蛇卻不見了影蹤, 救星檢查了房間的每個角落都不見牠, 只好在牆角上噴了那次買香薰時送的驅蚊水, 又在一些櫃邊噴殺蟲水, 就鳴金收兵.

今天趁著SOGO大減價, 跟我哥哥去逛了一個下午, 最後去到電器部, 我哥哥見到那兒有一部用音頻驅鼠,驅蚊等的小玩意, 那個售貨員嬸嬸聲稱那部小玩意連四腳蛇都可以驅走 (因為我challenge阿姐話個盒的圖並沒有四腳蛇), 而且是甚麼美國approve的, 我哥哥見減了價都只是二佰幾元, 便叫我買一部回家試試. 希望這部機真係work啦.

(後話: 今天買完那部玩意, 吃完飯後回到家後, 那條四腳蛇終於現身了, 最後給ddd趕了出窗外, 今晚可以安安樂樂的睡覺了, 其實四腳蛇大哥, 我知你係益蟲, 但係你真係太樣衰了, 我真係唔想再見你了)

Cooking Class

2008-05-25T01:35:00.006+08:00

因早前做了King Parrot的member, 收到他們的newsletter, 知道他們的A Touch of Spice辦了一個cooking class, 於是相約了兩位同事一起參加. 今天學的分別係"燒牛肉沙律配糯米飯"及"富貴黃金袋".

未去前我們還以為會到他們的廚房裡上堂, 原來是在餐廳裡上堂.

好, 開始, 我們先做燒牛肉沙律, 因為時間關係, 牛肉已經燒好, 我們只是負責切牛肉和做醬汁, 你只要隨意放你喜歡的配菜, 就自己喜歡的口味調較醬汁的味道, 好容易地就做了這道前菜.

做好沙律後, 還有休息時間! 因為工作人員要稍作清理及拿出下一道菜的材料. 準備好可以又再開始了, 這道黃金袋其實有點像炸了的石榴, 材料有肉碎, 蝦粒, 冬菇粒, 馬蹢粒, 又係時間關係, 大會已經幫各人準備好材料及調味, 我們要做的只係學如何用腐皮包及用蔥來紮好. 紮好後, 我們便用油慢火炸, 大概六七分鐘便完成了, 味道及賣相都唔錯.

我拿了這些食物回娘家, 家人都覺得幾好味, 不過當我哥哥知道有這麼多是大會準備定給大家, 就不禁取笑我只是個executor!

無線經典台

2008-05-24T01:25:00.002+08:00

最近subscribe了now的無線經典台, 其實平日多要OT的我 (其實除了病了外, 每日都在OT!), 回家後都沒太多時間看電視. 但自從有了經典台後, 真的不得了, 那些熟悉的劇集如鹿鼎記, 生锈橋王等, 真的很難令人不追看. 有時看到一些藝員, 如劉青雲, 吳震宇等, 當時只是做二打六角色, 真的好好笑.

實在有點期待即將播的新紮師兄啊!

麥潤壽

2008-05-21T00:21:00.007+08:00

自小已是商台fans, 由小時候跟媽媽聽十八樓c座, 廣播劇等, 到中學時代聽軟硬天使, 到現在的光明頂, 蘇詩黃, 一直都聽商台的多, 因為覺得港台的節目沒有甚麼特別, 尤其討厭陳淑梅 (很吵耳)及甚麼三個寂寞的心.

但自從幾年前還在讀master時, 坐ddd的車回家時聽港台麥潤壽的"星空奇遇鐵達尼" 這個節目, 才認識有這個人的存在, 當時覺得為什麼會人打去給主持大罵一場這麼傻呢?

到現在差不多每天都會聽這個節目(因為ddd實在太討厭聽陶傑的光明頂), 聽得多了開始有點頭緒, 我發覺麥sir的腦筋轉得頗快, 每當遇到不同種類的聽眾便會用不同的溝通方法, 如鼓勵, 激將法, 罵, 哄等, 而他對老人家亦很好, 很尊重, 對小朋友就好friend, 難怪每天都有這麼多人打電話給他.

而我這幾個月來最所賞他的是他對下一代的付出, 原來他每年暑假都會攪一個叫"同學會"的活動, 專門給中五中七的學生們參加, 主要是教導他們一些課堂以外的東西, 如presentation skills, 拓闊學生們的眼界. 而他亦有個要求, 就是一經取錄, 參加者要有100%出席率 (當然如有要事可以請假), 我聽見有些學生會話到時可能會有事不能出席, 但麥sir會同佢地講其實佢自己都未必會知道自己到其時會唔會有其他要事, 但時間是可以自己安排的, 而麥sir自己亦唔係必須要攪這個同學會的, 只是想給同學們一個學習機會. 我覺得麥sir講得好啱, 而佢這樣除了可做到一個榜樣外, 又可教導時下的年青人多些責任感. 如果我讀書時有這樣的活動, 我都想參加參加.

還有還有, 麥sir自己亦會唱歌, 有時我覺得他唱得還好過Albert Au呢!

網誌 vs 日記

2008-05-20T00:04:00.005+08:00

不知是否科技的發達帶動人的改變, 以前我不太喜歡將心裡的想法說出來, 但近日卻喜歡上朋友的blog 看看, 主要是想要知道朋友們的近況. 不知怎的自己也想寫寫blog來, 跟大家分享一下所見所聞, 亦希望朋友也會閒時記起我, 走來看看我的近況.

我覺得blog有點像日記, 有些人會每天都寫一遍, 紀錄今天所發生特別的事情或想法. 但是記得小時候, 日記是一種秘密, 要收藏起來, 不能給愉看, 有些人甚至會買一本有鎖的日記呢! 但blog就剛好相反, 是公開的 (當然現今的科技可以restrict某些有login的人看), 甚至希望更多的人看, 我見我有些朋友因而認識了一些志同道合的網朋.

不知道會不會有一天學生們需要寫網誌來交週記呢!

龍鳳胎

2008-05-19T00:55:00.001+08:00

星期五除了是去聽盧冠廷演唱會的日子外, 還是我一位舊同事Coby龍鳳胎出世的日子呢!

今天我就去了醫院探望這對孖胎, 他們很厲害, 兩個都可以重五磅多, 不用瞓箱, 好叻啊! 希望你們健健康康, 開開心心!

Beyond

2008-05-19T00:04:00.001+08:00

星期五晚去了聽盧冠廷的演唱會, 有很多有份量的音樂人做嘉賓, 其中包括林子祥及李宗盛. ddd本身就很喜歡林子祥的, 我亦曾跟他一起去聽阿Lam的演唱會, 他的確很厲害, 現場唱得還好過唱片. 當晚是我第一次現場聽李宗盛, 看見他好像不太用力氣的就已有一把雄厚的歌聲, 真是值回票價. 當晩我們討論哪個音樂人比較厲害, ddd有以下的結論:

兩位嘉賓(阿Lam及李宗盛)都唱得比盧冠廷好 (其實我覺得Lo Lo都好好)
李宗盛的作品都很好聽 (包括張國榮唱過的"最愛"), 但他的作品風格沒有太大的變化
林子祥的作品則有很多種類, 如數字歌, 中國小調等, 所以ddd覺得他是最勁的

而前兩晚我們發現了now的MTV台有個節目叫"24轉",這節目主要重播舊的MTV, 而當晚就播了Beyond的海闊天空,雖然ddd並不喜歡他們, 但他講了一句"其實佢地都幾勁, d歌隔了這麼多年一點都唔覺老土". 想想也是真的, 當年正因為海闊天空這首歌令我喜歡這隊樂隊, 誰不知家駒就在不久的時候因意外過身, 以他當年這麼年輕, 而他們的歌亦開始為人接受, 就這樣死了, 令人婉惜. 我是在他死後才追聽他們的舊歌(其實是之後才有零用錢去買他們的CD).

最近四川大地震, 一幕幕令人悲慟的畫面, 引起各界發起關注, 而大家都不約而同的播起Beyond的歌曲來, 那是因為他們的歌很勵志, 很有意思, 能帶給人一種力量似的. 而今日更聽到劉德華用了Beyond的海闊天空, 改了國語歌詞, 作為今次的賑災歌曲, 適逢今年是家駒逝世十五週年, 真的想知道如果他還在生的話, Beyond會還在一起嗎, 歌曲還是那麼好聽嗎?

大家好

2008-05-18T02:05:00.000+08:00

本網誌今日開張大吉, 萬事皆宜, 希望大家多多指教